Serra 2020 semedê cinîyan rîyê janê Korona ra zehmetêr ravêrte la cinîyan rixmê heme zehmetîye mucadele canêverda û kuçeyan de wayîrê heqanê xo vejîyayî.

Tirkîya û Vakurê Kurdîstanî de şîdetê vera cinîyan dilab-hîrlab zêdîya. Bitsybetî têgêrayîşê cinîyan ê kurdan hedefê îqtîdarî de yo. Aktîvîstê TJA û Komeleya Cinîyan  Roza komkerde ameyî destbendkerdene. Reyna bi destê dewlete tacîz û tecawuzan dewam kerd. Rixmo ke Îpeke Era ke badê tecawuza çawişê pîsporî Musa Orhanî xo kişt dewlete senî ke tim tecawuzker û qetilkaran pawena, Orhan zî pawit û serbest vera da. Hukmatî waşt ke Pêkerdişê Îstanbulî ke xora nîno caardene betal bikero la cinîyan pê çalakîyan destûrê nayî nêda û wazenê ke pêkerdiş pratîk de bêro caardene.

Performansê Las Tesiso ke 2019 de Şîlî de ame destpêkerdene. Sey protestoyê vera tecawuz û şîdetê serê cinîyan 2020î de heme dinya ra vila bi. Seba ke çalakîyanê 8ê Adare de na deyîra ke vana dewlete tecawuzker a, Tirkîya de ame vatene cinîyî raştê şîdetî ameyî.

Meksîka de seba ke şîdetê vera cinîyan zêdîya cinîyî wiriştî payan ser û vera polîtîkaya hukmatî yê vera cinîyan eyaletê Sonora de Mehkemeya Berze vêşna.

Sudan de çalakîyanê semedê îstîfayê dîktator El-Beşîrî de cinîyî bîyî sembolê mucadeleyî. Xoverdayîşê cinîyan serkewt û sutenê cinîyan ame qedexekerdene. Reyna qedexeyê seyahatî yê cinîyan cezaya îdamî ya vera LGBTİ+yan zî ameye werdaneyene.

Cinîyan ê Polanya vera qedexeyê kurtajî vejîyayî kuçeyan û netîceya xoverdayîşê cinîyan de qanûnê qedexekerdişê kurtajî meclîs de ame redkerdene.

Bajarê Mendoza yê Arjantînî de vera kiştişê domana 14 serre cinîyan çalakîya protestoyî de qesra edaletî vêşna.

Goreyê raporê Komîsyonê Cinîyan ê Neteweyê Yewbîyayeyî  rîyê janê Korona  ra şîdetê vera cinîyan û feqîrîye zafêr bîyî. Nê zî cuya cinîyan a ke xora zehmet a giranêr kerd la rixmê heme zext û zordarîye cinîyan xoverdayîşî ra xo peyser nêant û kuçeyî canêverdayî.