Kantonê Vaudî yê Swîsre de 7ê adare de weçînayîşê herêmîyî estê. Şaristanê Lozanî de 2 cinîyê kurdî yê bi nameyê Sevgî Koyuncu û Derya Çelîk seba îdareyê meclîsê şaredarîye bîyî namzet.

Derya Çelîk Partîya Sosyalîste û Sevgî Koyuncu zî Partîya Karkerana Swîsre (POP) ra bîyî namzet.

Derya Çelîk serranê 1990an de sebebanê polîtîkan ra koçê Swîsre kerdo û Lozan de meseleyanê cinî û koçberan ser o xebatî kerdê. Çelîke ANFyî rê qisey kerd û vat: ''Ez ê serran ra nata pê nasnameyê kurdî koçberan ser o xebitîyena. Seba nasnameyê xo yê kurdî, cinî, koçberan mi waşt ez şaristanê xo de biba namzet. Ez pê bawer a ke sere de cinî û ciwanî kurdîstanijî do paştî bidê mi.''

Sevgî Koyuncu zî 13 serrî yo Lozan de ciwîyena û mamostaya domanan a. Sevgî Platformê Grevê Cinîyan ê Swîsre de aktîf a û seba heqanê cinîyan têkoşîn kena. Sevgî derheqê projeyanê xo de wina vat: ''Pê dînamîko ke cinîyan ê kurdan awan kerdo ma girîngî daye meseleyanê cinî û koçberan ser. Partîya ma POPî heta nika seba kurdan û pêro koçberan xebatê faydeyînî kerdî. Ma wird cinîyî partîyanê cîyayan ra namzet bibî zî ma merdiman rê beran akenê û qala projeyanê xo kenê.''