Seba ke pêroyê Almanya de grevê femînîstî organîze bikerê, 300 cinîyê grûbanê lokalan ê 35 bajaran, peynîya hewteyî de, Berlîn de ameyî têhet û pîya xebetîyayî. Xebatê cinîyan bi panelê, ‘Ray û raybazê girevî çi yê? dest pêkerd. Temsîlkara têgêrayîşê Lîgîa NîunaMenosî ya Arjantînî, Sîlvîa NoûnadîMeno ya Îtalya, aktîvîsta grevê cinîyan a Polonya Marta û Gîsele Notz a ke serra 1994’î de grev de ca girewto, qalê tecrubeyanê xo kerd.    

MA PAŞTDARÎYE BIDÊ LEYLA GUVENE

Hetê bînî ra babetê sey: mucadeleyê cinîyan ê Îranî, mucburîyetê xonimitene û emperyalîzm zî panel de ameyî qiseykerdene. Sozdar Koçere zî qalê mucadeleyê cinîyan ê Kurdan kerd û va cinîyê Kurdî yê ke bêçaretîye ra bîyê koçberî û ameyê Almanya do beşdarê grevî bibê. Koçere wina va: “Leyla Guvene, seba ke tecrîdê serê Rayberê Kurdî Abdullah Ocalanî bêro wedaritene û newe ra dest bi dîyalogî bêro kerdene, 100 rojan ra zêde yo ke grevê vêşanîye de ya. Naye ra zî, ma venga sazî û rêxistinanê cinîyan danîme ke wa paştdarîye bidê nê xoverdayîşî.“

Xebatan de babetê sey; awankerdişê sîstemê mîyannneteweyîyî, hetê ê yê medya û çapemenîye, nijadperestîya antî Misilmane û waştişê hemparî, atolyeyan de ameyî qiseykerdene.

Peynîya kombîyayîşî de cinîyan kolanan de xebatêka qije viraşte û kolanê Karl-Marks-Alle yê Berlînî trafîkî rê girewt. Cinîyan seba paştdarîya Leyla Guvene pankartî kerdî xo dest.