Platformê Ma Do Verê Kişîyayîşê Cinîyan Bigêrê (KCDP) raporê xo yê menga çeleyî eşkera kerd. Goreyê raporî çele de camêrdan tewr tay 31 cinîyî qetil kerdî û 21 cinîyan zî bi hawayêkê şikdarî dinyaya xo bedilnaye.

Goreyê raporî 6 cinîyî seba ke waştêne cîya bibê, nêwaştêne pêbikerê, zewaj red kerdo ûsn; 1 cinîye bi bahaneyanê ekonomîkan ra û 1 cinîye zî seba ke dadîya xo pawite ameyî qetilkerdene.

Çele de 19 cinîyî keyeyê xo de, 7 cinîyî kuçeyan de, 2 cinîyî mekanê şayîye de, 2 cinîyî warê umûmîye de, 1 cinîye mîyanê wesayîtî de ameyî qetilkerdene.