Têgêrayîşê Cinîyan ê Azadan (TJA) û Meclîsê Cinîyan ê DEM Partî çarçewa Roja Cinîyan a 8ê Adare de sere de Çewlîg xeylêk şaristanan de çalakîyî kerdî.

Çewlîg

Meclîsê Cinîyan û TJA bînaya DEM Partî de bi beşdarîya Wekîla DEM Partî Salîha Aydenîz, namzeda Şaredarîya Çewlîgî ya DEM Partî û xeylêk cinîyan eşkerayîye daye. Çalakîye de pankarta 'Bi Jin, Jiyan, Azadîye; Ma qirkerdişanê cinîyan rê vajê ney'' ameye akerdene..

Cinîyan çalakîye de qurdeleyê morî kerdî milê xo ra û hîkayeyê Denîze Poyraz, Ozgecane Aslan, Îpek Er, Sakîne Kultur, Şule Çet, Rojwelat Kizmaz, Guldunya Tore, Jîna Emînî, Behiye Ecevît, Gulistan Doku û xeylêk cinîyan wendî.

Dima Wekîle Salîha Aydenîz qisey kerd û vat: ''Hîkayeyê cinîyan her ca de heman ê. Ver bi 8ê Adare ma do her ca de têkoşînê xo pîlêr bikerê. Sey têgêrayîşê cinîyan ê kurdan ma do çar parçeyanê Kurdîstanî û dinya de têkoşînê xo rê dewam bikerê. Cinîyî qetî vera camêrd-dewlete milê xo nêarê war.''

Şirnex

Meclîsê Cinîyan û TJA qezaya Hezexî ya Şirnexî de startê 8ê Adare bi eşkerayîyêka çapemenîye da. Cinîyî bin kincanê xo yê herêmîyan tewrê eşkerayîya verê bînaya DEM Partî bîyî. Cinîyan eşkerayîye ra verî erbanîyî dayî piro û bi sloganê ''Jin, Jiyan, Azadî'' govende girewte. Hemsereka DEM Partî ya Şirnexî Nurcane Alturl eşkerayîye wende. Eşkerayîye de venga pêro cinîyan dîya ke vera şîdetî têkoşînê hemparî bikerê.

Îstanbul

TJA, Kongreya Demokratîke ya Şaran (HDK) û Meclîsê Cinîyan qezaya Fatîhî de verê bînaya DEM Partî de bi eşkerayîyêke startê çalakîyanê xo da. Sere de Wekîlê DEM Partî Ozgule Sakî û Kezbane Konukçu Kok, namzeda Şaredarîya Îstanbulî ya DEMî Merale Daniş Beştaş, Hemsereka DEM Partî ya Îstanbulî û Mayê Haştîye xeylêk cinîyî tewrê eşkerayîye bîyî. Eşkerayîye de dowîzê sey ''Tecrîd do biqedo, azadîye ser bikewa'', ''Hinî bes o, dem demê azadîye yo'' ameyî akerdene. Dima eşkerayîye ameye wendene. Merale Daniş Beştaş çalakîye de cinîyê tepişteyî yê xoverdayoxî selam kerdî û pare kerd ke ê do heta şanê 8ê adare meydanan de bibê. Dima hunermendê MKMyî vejîyayî sehne ser û cinîyan govende girewte.