Wekîla DEM Partî Sumeyye Boz: Îqtîdar wazeno bi destê Hîzbullahî cinîyan û komelî bigêro binê teda û tesîrê xo. Dewleta tirke Hîzbullahî rê berê Meclîsî akerdî û wina gamê nê prosesî yê verênî eştî.
Bi bahaneya Filîstînî Vakur de bi taybetî Amed de hêrişê Hîzbulkontrayî zêdîyayî ke nê hêrişî serranê 90an anê vîrê merdiman.
Wekîla DEM Partî ya Mûşî Sumeyye Boz nê hêrişî ANFyî rê ercnayî.
Boze dîyar kerd ke planê stratejîkî yê netewa dewlete yê vera têgêrayîşanê îtîrazî newe nîyê û heta ke dewlete netîce bigêra yan zî bin bikewa nê hêrişî do dewam bikerê.
Boze bale ante serebûtanê Zanîngehê Dîcle yê 2013î ser û pare kerd ke waştişê zanîngehê xoserî yê ciwananê welatperweran raştê hêrişanê Hîzbullahî ameybî. Boze vist vîrî ke 2014 de zî wextê Xoverdayîşê Kobanê de provakasyonê Hîzbullahî qewimîyabî û vat: ''Serrêke dima seba ke serkewtişê weçînayîşanê 7ê hezîrane bêro çinkerdene hêrişî ameyî kerdene. Weçînayîşanê 2023yî de zî berê Meclîsî Hizbullahî rê ameyî akerdene. Bi nê hawayî bingeyê hêrişanê vera serkewtişê weçînayîşê 31ê adare yê DEM Partî erzîya.
Sey serranê 90an girseyê ke paştî danê sîyasetê kurdan yenê tehdîtkerdene. Dewlete bi xo bi destê Hîzbullahî nê çîyan kena. Dewlete amade kena, Hîzbullah ano ca. Îqtîdar wazeno bi destê Hîzbullahî cinîyan û komelî bigêro binê teda û tesîrê xo. Îqtîdar xîret keno ke kurdan ceza bikero. Hedefê Hîzbullahî yo verên têkoşînê cinîyan ê kurdan o. Çunke têkoşînê cinîyan resayo formê jineolojî.''
Sumeyye Boz ard ziwan ke mehkemeyî binê kontrolê dewlete de yê û mumkîn nîyo ke dewlete ra azade têbigêrê. Boze îfade kerd ke coka hêrişê Hîzbullahî do bêceza bimanê.
