Cinîyan bi wesîleya serrgêra yewine ya qetilkerdişê Jîna Emînî, vengdayîşê Koma Ozgurluk Azadî Freedomî ser o Kadikoy de çalakîye kerde. Çalakîye de pankarta 'Ma bi porê Jîna Emînî azadîye vînenê' ameye akerdene. Wekîlê Partîya Çep a Keske Ozgul Sakî, Çîçeke Otlu, Înîsîyatîfê Mayanê Haştîye û xeylêk rêxistinî tewrê eşkerayîye bîyî.

Cinîyê îranijî eşkerayîye ra verî hetê polîsan ra ameyî astengkerdene. Cinîyan pê sloganê 'Jin, Jiyan, Azadî' no protesto kerd. Dima cinîyê îranijî zî kewtî warî û eşkerayîye ameye dayene.

Cinîyan dîyar kerd ke qetilkerdişê Jîna ra dima sloganê 'Jin, Jiyan, Azadî' her cayê dinya rê vila bîyo û cinîyî seba azadîya xo vejîyayê meydanan. Cinîyan îfade kerd ke cinîyan rixmê pêro tedayan zî têkoşînê xo yo rêxistinkerde pîl kerdo û vat: ''Ma ewro reyna ameyî têhet. Ma do Îran û Tirkîya de û her ca de vera dîktatoran vajê azadîye. Rayîrê azadîye teyna têkoşîno hempar o.''

Eşkerayîye bi sloganan qedîyaye.