Endama Koordînasyonê PAJKî Aytene Dêrsim û Endama Meclîsê PAJKî Têkoşîne Ozan Medya Haber TV de bernameyêkê taybetî de qala ronayoxanê PKKyî ra Sakîne Cansiz (Sara) kerde.

Aytene Dêrsim destpêkê qiseykerdişê xo de Qirkerdişê Parisî yê 9ê Çeleyê 2013î şermezar kerd ke tede Sakîne Cansiz, Fîdane Dogan û Leyla Şaylemez ameybî qetilkerdene. Aytene Dêrsim vat: ''Ma soz danê şehîdanê xo ke erk û mesuldarîyanê xo bîyarê ca. Embaze Sara tewirê têkoşînê ma yê 50 serran o. Xeta têgêrayîşê cinîya azade ya kurde ya. Embaze Sara bi tewirê xo yê şorişgêrî serkêşîya şaran kerde. Ewro pêro dinya de konferansanê cinîyan de fotografê aye yenê dardekerdene.

Embaze Sara eşiqa azadîye bîye. Merasîmê cenazaya aye de Ewropa de bi hezaran kesî kom bibî. Şehadetê embaze Sara Dêrsim ancî lerzna. Embaze Sara bi têkoşînê xo estbîyayîşê Dêrsimî mojna. Heyf ke qirkerdişê cinîyan nêqedîyenê. Bi taybetî têkoşînê azadîye ê cinîyan vera qirkerdişî tim xo ver danê. Dêrsim de qirkerdiş ser nêkewt. Dişmen wazeno Dêrsimî û pêro Kurdîstanî xalî bikero û şarê ma bê rêxistin war verdo. Sena ney zî hêrişê neslanê ma yê ciwanan keno. Nka tedayan ra ciwanê ma welatî teriknenê. La teriknayîşê welatî yeno manaya xurtkerdişê dişmenî. Ma ney zanenê. Belê zehmet o la têkoşînêk est o ke ma zaf bi xurtî nêzdîyê serkewtişê ci bîyê. Şexsê embaze Sara de bi wesîleya na roje mi waşt ke nê wezîfeyî bivisna vîrî.''

Têkoşîne Ozan ard ziwan ke Sakîne Cansiz 40 serran ra zêdeyêr têkoşîn kerd û têkoşînê aye hetê şagîrtanê ci ra ewro zî yeno kerdene. Têkoşîne Ozan vat: ''Bêguman ma do ser bikewê. Ney zî raştîyêke afernaye. Ma ra têkoşînî ra ber rayîrêk çin o. Seba estbîyayîşî bi taybetî cinîyî neçare yê xo bipawê. Êyê ke eşkenê xo bipawê eşkenê qisey bikerê, tercîhî bikerê, tewirêkê îradeyî bimojnê. Yanî xopawitiş yeno manaya estbîyayîşî. Tewrbîyayîşê embaze Sara û têkoşînê aye yê 40 serran tewirê xopawitişî bi.

Embaze Sara vatêne 'cuya mi tim bi şerî bîye.' Şerê embaze Sara şerê ma pêroyînan o. Ganî ma nê şerî pîlêr bikerê. Ma nika mîyanê şerê dinya yê hîrêyînî de yê ke tede qirkerdişê pîlî yenê kerdene. Biewnê Kurdîstan de, Armenîstan de, Gazze de, Afganîstan de cinîyî yenê qirkerdene. Coka ewro rêxistinî û yewîya cinîyan yew mecburîyet a. Nê hetî ra PKK wayîrê tecrubeyanê pîlan o. Ganî ma dormeyê azadîya Rayber Apoyî de rêxistinîya xo û têkoşînê xo yê azadîye pîlêr bikerê. Azadîya Rayber Apoyî azadîya pêro cinîyan a. Seba vîrameyîşê embaze Sara, Fîdane Dogan û Leyla Şaylemez ganî ma têkoşînê xo pîlêr bikerê, çalakîyanê xo bizêdînê. Ez venga pêro cinîyan dana ke serê rayîrê Sakîne de tewrê têkoşînî bibê. Ez Qirkerdişê Parisî bi nefretî şermezar kenê. Embazanê xo yê şehîdan bi rêzî yad kena.''