Meclîsê Cinîyan ê HDPyî vera şîdetê camêrd û dewlete derheqê 25ê Teşrîna Peyêne Roja Têkoşînê Vera Şîdetê Serê Cinîyan de 7ê teşrîna peyêne de kampanyayêke daye destpêkerdene.

Vervatoxa Meclîsê Cinîyan ê HDPyî û Wekîle Ayşe Acar Başaran derheqê 25ê Teşrîna Peyêne Roja Têkoşînê Vera Şîdetê Serê Cinîyan de vat: ''Zêdebîyayîşê şîdetê vera cinîyan netîceya polîtîkaya mîlîtarîst a dewlet a. Seba ke ma raştîyan bîyarê ziwan 7ê teşrîne peyêne de kampanyaya xo ya seba 25ê Teşrîna Peyêne Roja Têkoşînê Vera Şîdetê Serê Cinîyan daye destpêkerdene. Ma do vera şîdetê camêrd û dewlete têkoşîn bikerê. Çunke nê wird şîdetî yewbînan weye kenê. Ma Tirkîya de têgêrayîşanê femînîstan reyde û Kurdîstan de zî TJA reyde xebatanê xo kenê. Nê têgêrayîşî xo resnenê tax, kuçe û meydanan.

Ma seba cnîyan budçeyêka taybete amade kerde û pêşkêşê Meclîsî kerd. Reya verêne partîya ma wina yew budçe amade kerde. Budçeyê nikayênî yê dewlete seksîst ê û xizmetê şer, rant û terefgîran keno. Ma wazenê cinîyî pêro waran de bêrê îstîhdamkerdene. Wextêkê nêzdî de ma derheqê na budçe de raporêkê hîrayî pare bikerê.''

Başarane bale ante ser ke wextê pandemî de şîdetê vera cinîyan zêdîya û vat: ''Wexto ke ma sey cinîyan vera nê şîdetî vejîyenê meydanan bi bahaneya pandemî yenê astengkerdene. Ma zanenê ke no krîzê kapîtalîzmî yo û alternatîfê ci zî azadîwaştoxîya cinîyan, ekolojî, demokrasî, têdûştîya cinîyan û cuya komunal û kolektîf ê. Cinîyê têkoşerî do nê alternatîfan awan bikerê. Pandemî ra dima cinîyî do reyna meydanan de bibê. Çunke ma pê zanenê ke faşîzmî vîrusî ra zêdêr bitehluke yo.''