Têgêrayîşê Cinîyan ê Azadan (TJA) vizêr Amed de roja yewine ya konferansê xo 'Zîncîrê Bêvengîye: Rijnayîşê Dêsanê Dormeyê Tepişteyanê Sîyasîyan' qedînaye. Roja verêne de roniştişê 'Bi muhakemekerdiş û tepişteyanê sîyasîyan huqûqê netewe-mîyanneteweyî' ame kerdene.

Roniştiş bi moderatorîya avûkate Rukene Gulagaci ameye kerdene. 

Dr. Diana Restrepo Rodriguez  bi rayîrê Zoomî roniştiş de qisey kerd. Diana Restrepo Rodriguez qala xoverdayîşê zîndananê Amerîkaya Latîne kerde û vat: ''Pêro dinya de vera cinîyan îşkenceyî yenê kerdene. Bêvengîye tenatîye afernena, tersî xur kena. Coka ganî ma bêvengîye werte ra wedarnê.''

Avûkate Maria Kristina Conti zî qala têkoşînê cinîyan ê Fîlîpînî kerde û vat: ''Kesê ke vera hukmatî yê sey terorîstan yenê mojnayene. Zîndanan de vera cinîyan ê tepişteyan tedayê pîlî est ê. Ganî ma tedaya zîndanan ver de vinderê.''

Avûkata katalane Altemira Guelbenzu Gonzalo bi rayîrê Zoomî konferans de qisey kerd û da zanayene ke cinîyê ke tewrê çalakî û nawnayîşan benê cezayanê giranan gênê. Altemira vat: ''Zîndanî cayê îşkence û tedayan bîyê. Şertê zîndanan cinîyan kenê nêweş. Se ra 70ê cinîyî zî zîndanan de raştê hêrişê cînselî yenê.''

Peynîya konferansî de zî Endama Komeleya Huqûqnasan a Seba Azadîye (OHD) Ebruye Akkal qisey kerd. Ebruye Akkal vat: ''Şîdetê dezgehanê muhakemekerdişî zêdîyeno. Tirkîya de bi hezaran cinîyan ê aktîvîstan, sîyasetmedaran û muxalîfan zîndan de yê. AKP-MHP cinîyan û dezgehanê cinîyan ê sey TJA krîmînalîze keno. La cinîyî zî vera ney tim xo ver danê. Prosesê muhakemekerdişî de zî cinîyî raştê şîdetê psîkolojîkî yenê. Dewayan de cinîyan rê cuya înan a taybete persîyena. Hetê bînî ra bi taybetî wextê peyênî de bi bahaneya cezayanê dîsîplînî înfazê cinîyan ê tepişteyan yeno vêşnayene.''

Roja verêne ya konferansî  qiseykerdişan ra dima qedîya. Konferans ewro ancî Amed de do dewam bikero.