Amed de bi wesîleya 8ê Adare Roja Cinîyan ê Kedkaran a Dinya  Meydanê Îstasyonî de mîtîng yeno kerdene. Mîtîng serkêşîya Têgêrayîşê Cinîyan ê Azadan de yeno kerdene. Meydan de pankartê bi nuşteyê ‘’Têkoşîn ma bihêz keno, haştîye rêxistin keno’’, ‘’Peymana Îstanbulî pawena’’, ‘’Vera qirkerdişê cinîyan ma waran de yê’’ ameyî daliqnayene.

Cinîyan warê mîtîngî de sloganê sey “Jin jiyan azadî” , “Jin jiyan azadî, azadiya Rêbertî” , “Bijî Serok Apo” , “Bê Serok jiyan nabe” vatî.

Mîtîng de hêverî Hemşaredara Amedî Serra Bucak qisey kerd û bale ante mesajê Rayber Apoyî ser. Serra vat: ‘’Ma seba ke mesajî bivurnê haştîye tîya de yê. Ma do pîya haştîye biqîrê.’’

Dima Mayanê Haştîye sehne ser de bewranî perrnayî.

Aktîvîsta TJA Gultane Kişanak pêro cinîyî selam kerdî û vat: ‘’Seba caardişê vengdayîşê Birêz Ocalanî ganî destê ma ra çi bêro ma bikerê.Ganî tecrîdê Îmraliyî bêro wedaritene. No do berê haştîya Rojhelatê Mîyanênî abikero.’’

Vervatoxa Meclîsê Cinîyan ê DEM Partî Halîde Turkoglu vat: ‘’Pêro dinya bala xo daya mesajê Ocalanî. Vengdayîşê Birêz Ocalanî vengdayîşê hîrakerdişê têkoşînê cinîyan o. Ganî ma wayîrê nê vengdayîşî bibê. Ma 8ê Adare bikerê roja haştî û yewîye.’’

Ayla Akat Ata dîyar kerd ke mesajê Rayber Apoyî proses derbazê safhayêka bîne kerdo û vat: ‘’Haştîye hêvî ya û ganî seba çareserîye têkoşîn bêro kerdene. Barê haştîye seba her kesî giran o la cinîyî amade yê ke nê barî bigêrê. ‘’

Mîtîngî bi govendan, sloganan û konserê Rojda dewam kerd.