Endamanê Platformê Cinîyan ê Dîcle Amedî (DAKAP) çarçewa 25ê Teşrîna Peyêne Roja Têkoşînê Vera Şîdetê Serê Cinîyan de waşt ke Meydanê Berê Koyî de cinîyanê ke ameybî qetilkerdene yad bikero. La polîsan dormeyê cinîyan girewt û bi bahaneya pandemî destûr nêda ke eşkerayîye bêra wendene. Cinîyan amîranê polîsan reyde pêvînayîşêko xurt kerd û netîceya pêvînayîşî de parka Meydanê Berê Koyî de eşkerayîya çapemenîye ameye wendene. Wekîla HDPyî Remzîye Tosun, aktîvîstê TJA û xeylêk cinîyî beşdarê eşkerayîye bîyî.

Cinîyan fotografê cinîyanê ke ameybî qetilkerdene û dowîzê hîkayeya înan berz kerdî. Polîsan dest na fotografê Sakîne Cansiz, Fîdane Dogan û Leyla Şaylemez ê ke Paris de ameybî qetilkerdene û fotografanê Sêve Demîr, Pakîze Nayir û Fatma Uyar ê ke Sîlopî de ameybî qetilkerdene ser.

Sereka Komeleya Cinîyan a Rosa Adalet Kaya eşkerayîye wende û wina vat:''Na cografya de her roje camêrdî cinîyan qetil kenê. Nê cinîyî pêro wayîrê waştiş û hêvîyan bîyî. Seba ke Peymana Îstanbulî nêna caardene cinîyî qetil benê. Dewlete bi nê hawayî nê cînayetan tesdîq kena. Ma do her tim nê cinîyan bîyarê xo vîrî. Heta ke verê kişîyayîşê cinîyan bêro girewtene ma do meydanan de bibê, têkoşîn bikerê. Ma do pê xopawitişî peynîya nê cînayetan bigêrê.''

Cinîyan eşkerayîye ra dima sloganê 'Cinîye, Cuye, Azadîye' û 'Kişîyayîşê cinîyan polîtîk ê' berz kerdî. Cinîyan dima deqayêk rêz girewt û hîkayeya 41 cinîyanê ke ameybî qetilkerdene wendî.