Cinîyan bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan Amed û Îstanbul de çalakîyî organîze kerdî.

Amed de Platformê Cinîyan ê KESKî waşt derheqê şîdetê dewlete û camêrdan ê vera cinîyan de eşkerayîye bido. Cinîyê ke pê pankartanê xo verê AZC Plaza yê Ofîsî de ameyî têhet raştê zextê polîsan ameyî. Naye ser o cinîyan çalakîya roniştişî kerde û bi tîlîlîyanê xo tewirê polîsan şermezar kerd û bi slogana ''Cinî, cuye, azaadîye'' gîrayî. Donê Gevher Koyuna ke bi nameyê KESKî tîya qisey kerd ard ziwan ke cinîyî her hetê dinya de vera şîdetî û wayîrvejîyayîşê heqanê xo vejîyenê kuçeyan û vat: ''Bi hewayêkê sîstemkî vera cinîyan şîdet yeno kerdene. Dewlete camêrdanê hêrişkaran pawena. Senî ke ma tim vanê, ewro reyna  ma tîya ra vanê ke şîdetê vera cinîyan polîtîk o û têna pê xoverdayîşê cinîyan eşkeno bêro vindarnayene. Ma do bi pîlkerdişê têkoşînî ser bikewê.''

Îstanbul de Komîsyonê Cinîyan ê DÎSKî Meydanê Îskele yê Kadikoy de eşkerayîye daye. Xeylêk cinîyî tewrê eşkerayîye bîyî bi slogan û pankartanê xo mesaj dayî ke ê nêtersene û verê zextê camêrd û dewlete de milê xo çewt nêkenê. Hemsereka Pêroyî ya DÎSKî Arzu Çerkezogluya  ke tîya qisey kerd vat: ''Ma do 25ê Teşrîna Peyêne de têkoşînê xo pîler bikerê. Camêrdê ke polîtîkayanê hukmatî yê vera cinîyan ra paştî genê şîdetê xo zêdînenê. Îqtîdarî bi wedarnayîşê Pêkerdişê Îstanbulî dişmenîya xo ya vera cinîyan fîna çiman ver. Cinîyî rixmê heme hêrişan do têkoşîn bikerê.''