Endama Koordînasyonê PAJK’î Koçerîn Amede, derheqê weçînayîşê 31’ê Adare û grevanê vêşanîye de, ANF’yî rê qisey kerd.

Amede ard vîrî ke, tarîx de komel û şarî tim waşto ke mekanîzmaya xorayberdişî awan bikero û bi no qeyde estbîyayîşê xo bipawo. Amede vana na rastîye destpêkerdişê tarîxê merdimahîye ra heta ewro esta û wina dewam kena: “Merdim eşkeno vajo nimûneyê destpêkerdişî yê  xoîdarekerdişî no erd de awan bîyê û bi destê cinîyan ameyê ronayene. Komelî problemê xo munaqeşe kerdê û aqlo hempar û rêbazê çareserîye peyda kerdê. Bi no qeyde bîyê wayîrê taybetîyanê demokratîkan.“

XOBÎYAYÎŞ Û XORAYRABERDIŞ GIRÊDAYÎYÊ WELATPERWERÎYE YÊ

Koçerîn Amede va xobîyayîş û xoîdarekerdiş girêdayîyê welatperwerîye yê û tespîtê winasîyî kerdî: “Êyê ke welatê xo ra hes kenê, her çiyî ra ver wayîrtîya erd, awe û cayê xo kenê. Wayîrê her warê cuye vejînê. Welatê xo îşxalkar û hêzanê kolonyalîstan rê nêverdanê. Seba naye, her çiyî ra ver ganî merdim welatê xo ra hes bikero.“ 

MODELÊ AKP-MHP’YÎ MODELÊ TÎRANÎYE YO

Amede bale ante dîktatorîya rejîmê AKP-MHP’yî ser û wina dewam kerd: “No model modelê tîranîye yo gonîn o. Seba ke xo bido qebûlkerdene, keno ke pêroyê cayan de îdareyî bigîro binê kontrolê xo. No sîstemê serekîye yo tîpê Tirkî yo ke nêzanîno çi yo, keno ke xo bikero mende û şarî mahkumê xo bikero, her çiyî ra ver wazeno ke hetê xo yê cayîyî(herêmî) bikero miqerem. Eke no ke bibo, meydananê herêman de ne rengê cinîyan, ne zî rengê bînî yê komelî do bimanê. No sîstem sîstemêko winasî yo. Her namzetê AKP’yî yo ke do bêro weçînayene Erdoganê tîranî mabênê şarî de bido qebûlkerdene û bibo temsîlkarê ey ê herême. No sîstem ke bibo serkewte, faşîzmo giran û tarî do bêro vilakerdene û teda û zordarîye hîna bi eşkera dewam bikero.“

SÎSTEMÊ HDP’YÎ DEMOKRATÎK Û AZADPERWER O

Amede derheqê modelê HDP’yî yê îdareyê herêmîyî de wina qisey kerd: “Her çiyî ra ver azadîya cinîyan esas gêno û normê koledarîye yê ke cinîyan ser ameyê ferzkerdene red keno. Bi ferasetê demokratîk, ekolojîk û azadîperwerîya cinîyan têgêreno. Pawitişê azadî, demokrasî û xozaye xo rê kerdo armenco bingehîn.“

WEÇÎNAYÎŞ DE SERKEWTIŞ MUHÎM O

Amede ard vîrî ke nika sîyaset û zîhnîyetê qirkerdişî karî ser o yo û înkar û çinekerdişî Kurdan rê keno ferz. Amede wina va: “ Naye ra zî ma zereyê mucadeleyê estbîyayîş û çinbîyayîşî de yê. Şarê ma rê hêrişê qirkerdişî yenê kerdene. Ma ver de dişmenêko winasî esto ke wazeno ke hêrişanê xo bêmabên dewam bikero. Naye ra zî weçînayîşê herêmî muhîm o. Ganî ma xo û statuyê rayraberdişê bajaranê xo bipawê. Netewa demokratîke bi hawayê bînî nêna ca. Rastîya xo de, Têgêrayîşê Azadîye yê Kurdan neteweya demokratîke arde bicaardene. Têgerê Azadîye yê Kurdan ra ver, mabênê Kurdan de problemê netewbîyayîşî estbî. Kurdî, hetê kolonyalîstan ra ameybî parçekerdene, vilakerdene û asta xoînkarkerdişî de bîyî. Bi mucadeleyê azadîye, şaro Kurd  ame pêser û seba netewbîyayîşî mucadele kerd.“

MUCADELEYÊ CINÎYAN NETÎCE GIREWTÎ YO

Amede îdareyê herêmî de, muhîmîya cayê cinîyan nîşan daye û wina va: “Mucadeleyê cinîyan ê vera faşîzmî de tim netîce ameyo girewtene. Hêzê ke vera mucadeleyê cinîyan de vindertê tim bîyê binkewte û qedîyayê. Naye ra zî îdareyê herêmîyan de estbîyayîşê cinîyan muhîm o. No seba averşîyayîşê komelî şert o. La Tirkîya de cinîyî teberê sîyasetî de ameyê pêgirewtene. Wexto ke merdim biewnîyo rê ci vîneno ke partîyê sîyasîyî zaf kêmî ca danê cinîyan. Xêrca HDP’yî, partîyê bînî weçînayîşê îdareyê herêman de qet ca nêdanê cinîyan.“

Amede bale ante ke faşîzm tim cinîyan ra terseno û wina dewam kerd: “Rejîmê AKP-MHP’yî zî wexto ke bi qayûman dest na bi şaredarîyan ser, her çiyî ra ver hêrişê sîstemê hemserekîye kerd. La cinîyan nê hêrişan ver, peyser game nêeştê û warê komelî û sîyasetî de mucadeleyê xo yê azadîye dewam kerd.

QAYÛMÎ DIŞMENÊ ŞARÎ YÊ

Şarê ma bi qayûman rîyê qirkar, îşxalkaranê îqtîdarê faşîstî yê AKP-MHP’yî hîna baş nas kerd. Qayûm dişmenê şarî yo. Qayûman her çiyî ra ver dest eşt sazîyanê cinîyan û padayî. Sazîyê cinîyan cayê parekerdiş, munaqeşekerdiş, çareserî û aqlê hemparî bî.

VERA DIŞMENANÊ CINÎYAN, GANÎ HÎNA ZÊDE BÊRO XEBETÎYAYENE

Xeylî namzetan tepişenê, ci rê gefan wanenê. Ganî cinîyê Kurdî, duştê Erdogano ke dişmenê cinîyano de hîna zêde bixebetîyê û xêrca serkewtişî alternatîfê bînî qebûl nêkerê. Mucadeleyê warê sîyasetê demokratîkî bi çêk nêbenê. Mucadele mabênê di xetan de derbaz beno. Di zîhnîyetî kewtê şer. Ganî ma pêro baş bizanê ke 31’ê Adare de weçînayîş do mabênê di xetan de bêro viraştene. Xeta yewîne: xeta demokrasîye ya ke bi cinîyan yena temsîlkerdene. Xeta diyîne: xeta faşîzmî ya tarî û zordar a. Ganî cinîyî bi qerar her ca de vengê xo bikerê berz û xeta azadî û demokrasîye bikerê serkewte.“

XOVERDAYÎŞÊ BI SERKÊŞÎYA LEYLA GUVENE;PAWITIŞÊ ŞARÊ KURDÎ YO

Endama Koordînasyonê PAJK’î Amede peynîya qiseykerdişê xo de bale ante xoverdayîşê  grevanê vêşanîye ser û wina va: “No xoverdayîş ramojneno ke kardîye resta bi este. Xoverdayîşê Leyla Guvene seba pawitişê şarê Kurdî yo. Naye ra zî ganî baş bêro fehmkerdene û xoverdayîş bêro pêtkerdene.“

ZERRÎYA MERDIMÎ BI XOVERDAYÎŞ BENA ASANE

Amede wina dewam kerd: “No xoverdayîş raperîyayîş o, vera koledarîye rawiştiş o. Nîşan û mucadeleyê azadîye yo. Leyla Guvene vana ke bi na çalakîye a sey ruhî bîya sivike û bi no qeyde rastîya mucadele û xoverdayîşî nîşan dana. Sakîne, Mazlum, Xeyrîyan zî xoverdayîşê xo yê vera 12’ê Êlûle de eynî rastîye ardbî ziwan. No zî musneno ma ke merdim bi xoverdayîşî beno keyfweş, zerrîya merdiman bena asane û merdim beno serkewte.

WAYÎRÊ RAYBER Û WELATÊ XO BIVEJÎYÊ

Êyê ke wayîrê war û welatê xo vejînê, wayîrê Rayberê xo zî vejîyenê. Êyê ke wayîrê xo vejîyenê, wayîrîya Rayberê xo zî kenê. Ez tîya ra venga cinî û ciwananê Kurd û Tirkîya  dana ke wa weçînayîş de vera faşîzmî bibê yew. Ez şexsê Leyla Guvene de, pêroyê xoverdayoxan rê silamê xo erşawena. Ma do miheqeq bibê serkewte, hêz û îradeyê ma yê serkewtişî esto.“