Fermandara Qerargehê Merkezî yê YJA-Starî Şafake Aryen bi wesîleya Roja Têkoşînê Vera Şîdetê Serê Cinîyan a 25ê Teşrîna Peyêne ANFyî rê qisey kerd.

Qiseykerdişê Fermandare Aryene ra tayê noqtayê girîngî wina yê:

''Şîdet sey çekêke hetê sîstemê serdestî ra yeno vilakerdene û şuxilîyeno. Şîdet xora atmosferê şerî de hîna zaf vila beno. Qanûnî seba ke hetê dewletanê neteweyîyan ra virazîyayê şer de zî cuya rojane de zî cinîyan şîdetî ra nêpawenê.

Texrîbatê Şerê Dinya yê Hîrêyînî hendê nêasenê. La bi taybetî Rojhelatê Mîyanênî de şer û şîdet seke bîyê mubah. Rojhelatê Mîyanênî de polîtîkayê qirkerdişî çarçewa Şerê Dinya yê Hîrêyînî de dewre de yê.

Seba ke têkoşînê cinîyan pîlêr beno, dinya de xoverdayîşê cinîyan zêdîyeno û felsefeya 'Jin, Jiyan, Azadî' xurtêr beno cinîyî hîna zaf yenê hedefkerdene. Sîstem keno ke cinîyan bêtesîr bikero.

Wextê hêrişanê DAÎŞî de şerwanê YPJyî û gerîlayê YJA-Starî ameyêne wesifnayene la nika nê cinîyî yenê terorîzkerdene. Şingal de cinîyî yenê remnayene bi Ewropa. Armenîstan de cinîyî şerê Qerebaxî de raştê tecawuzî ameyî. Yanî Rojhelatê Mîyanênî de çîyê giranî seba cinîyan qewimîyenê. 

Ma eşkenê vajê ke Rojhelatê Mîyanênî de ça de qirkerdiş û şerî est ê, binê ci de dewleta tirke est a. Dewleta tirke Başûr de bi destê PDKyî komelî yoz kena, Rojawan de teror kena, Filîstîn de şerî har kena û Sûrîye de alozîye vejena. Teyna têgêrayîşê azadîye yê kurdan eşkeno verê dewleta tirke de vindera. 

Coka dewleta tirke şarê kurdî, bi taybetî cinîyan ê kurdan kena hedef û polîtîkayanê ajankerdişî, fuhuşî, bêtesîrkerdişî, ajankerdişî ûsn. cinîyan ser de aver bena. Kurdîstan de qet yew serebût munferît nîyo. Mîsal serebûtê qetilkerdişê Narîne de dewlete bi xo sereyê serebûtî qefilna. Çunke keyeyê Narîne Huda-Parî ra bi. 

Cinîyê kurdî ganî nê kerdişan bivînê, çareserîya meseleya kurdan ferz bikerê û verê çimeyanê rejîmê faşîst-qirkerî bigêrê.

Cinîyî çend ke wayîrê xo-yewbînan vejîyê, birêxistin bibê û bi ferasetî têbigêrê hendê azad benê. Yanî cinîyî tewr verên ganî bieşkê xo bipawê. Cinîyî çarçewa xopawitişî de ganî pêro rayîranê mudaxeleyan bêtesîr bikerê.

Xopawitiş pawitişê waranê cuye û cewabdayîşê kerdişan o. Cinîyî ganî wayîrê erjanê xo vejîyê, her warê cuye de têkoşîn bikerê û komel şîdetê camêrdan û dewletan ra azade bikerê. 

Nika Kurdîstan de bi rayîrê maskeya tarîkan ajanîye yena ferzkerdene. Ganî cinîyî sey serkêşanê komelî yewinanê xopawitişî awan bikerê û bi çalakîyanê xo vera nê kanwazan têbigêrê.

Rêxistinîya xopawitişî ya cinîyan a tewr bihêze YJA-Star a. Ganî cinîyê ciwanî refanê ma de cabigêrê. 

Cinîyî cewherê xo de wayîrê cesaret, xoverdayîş, îrade û tecrubeyan ê. Kanwazî û dewlete nêeşkenê qerar bidê ke cinîyî ganî senî têbigêrê. Seke Rayber Apoyî vatbi 'Cinîyê ke terkê însafê camêrdan bîyê mehkumê binkewtişî yê.' 

YJA-Star hêzê xopawitişî yê cinîyan o. YJA-Star xeta Bêrîtane de xeta welatperwerîye ya cinîyan a. Têkoşînê YJA-Starî zî têkoşînêko îdeolojîk o. YJA-Star îradeyê cinîyan vurneno keno hêzê şerkerdişî. YJA-Star seba cinîyan mîsyon û vîzyonê xo ano ca, vera dişmenî têkoşînê gerîlatîye keno. Ma xo rê bedelanê pîlan û şehîdanê girîngan danê. Tewr peyêne embaza ma Asya Alî çalakîya vera TUSAŞî de îradeyêko xurt mojna ra û şehîd bîye. Merkezê têkoşînê ma de xeta Rayber Apoyî est a.

YJA-Star 32 serran ra nata têkoşînî rê dewam keno. Xora ma ra ver zî têkoşînê gerîlayan ê cinîyan est bi. Embaze Sakîne Cansiz, Besê Anûş, Azîme serkêşanê têkoşînê ma ra yê. La YJA-Starî têkoşînê cinîyan rêxistin kerd. Ewro YJA-Star eşkeno qederê şerî dîyar bikero û mudaxeleyê qewimîyayîşan bikero. 

Ma biranê îdamî yê vera Pexşane Ezîzî û Werîşe Mûradî şermezar kenê. Cinîyî cografyaya Rojhelatê Mîyanênî de hê ancenê. Coka hewceyê ma bi rêxistinîye est o. Rojhelatê Mîyanênî de seba çareserîya meseleyan û vergirewtişê şerî xopawitişê cinîyan tek çare ya. 

Mewzîyanê ma de neteweyanê cîyayan ra embazî est ê. Nê hetî ra ma eşkenê vajê ke artêşa YJA-Starî artêşa cinîyanê dinya ya. Bê têkoşînê hemparî nêbeno. Şîdet sîstematîk o coka têkoşîn zî ganî sîstematîk bibo. Serra 2024î bi têkoşînêkê xurtî derbaz bîya. Ma wina bawer kenê ke 2025 de têkoşîno hempar bêro pîlkerdene. 

Bi na wesîle ez venga pêro cinîyan dana ke têkoşînê hemparî bikerê û têkoşînê cînsîyetî seba dîyarkerdişê ameyoxê dinya bi radîkalî bikerê. Roje roja hesabpersayîşî, wayîrvejîyayîşê îradeyî, afernayîş û awankerdişê cuya hempare ya.

Ma sey YJA-Starî do vera şîdetî têkoşînê xo xurtêr bikerê. Felsefeya 'Jin, Jiyan, Azadî' ya Rayber Apoyî nasnameyê ma yo. Ma pêro cinîyan ê têkoşêran û çalakîkeran bi heskerdişî selam kenê û înan rê serkewtiş wazenê.''