Platformê Ma do Qetilkerdişê  Cinîyan  Vindarnê  (KCDP) raporê xo yê şîdet û qetilkerdişê vera cinîyan eşkera kerd. Goreyê naye camêrdan aşma adare de 29 cinîyî qetil kerdî.

Rapor de ame vatene ke sebebê mergê 23 cinîyan nîno zanayene. Di cinîyî bi bahaneyê ekonomî, çarê înan rîyê hesabê medyaya sosyale û seba ke verdayîş waşto ameyî qetilkerdene. Nê cinîyan ra çarê înan hetê kamî ra ameyî kiştene nîno zanayene. New cinîyî hetê mêrdayanê înan ra, panc cinîyî hetê waştîyanê înan ra, çar cinîyî hetê camêrdanê naskerdeyan û merdimanê înan ra,  di cinîyî hetê mêrdayanê înanê verînan ra, di cinîyî hetê lajanê înan ra, yewe hetê babîyê ci ra, yewe hetê waştîyê ci yê verîna ra û yewe zî hetê birayê ci ra ameyî qetilkerdene. Zafê înan keye de tay cayê karî de, tay wesayît de û tay zî erazî û kuçe de ameyî qetilkerdene.  Qetilkerdiş de tewr zaf çeke ame şuxulnayene û tay zî bi fatisnayîş, derbkerdiş û birnayîşî ameyî kiştene. Înan ra hîrê cinîyî binê pawitişî de bî.

Rapor de bale ameye antene serê rewşa Gulîstane Doku ya ke 5ê adare ra nate Dêrsim de vînîbîyaye ya û ame waştene wa derheqê aye de cipersayîşo zixme bêro kerdene û aqibetê ci bêro eşkerakerdene.

Eşkerayîye de ame vîrardene ke aşma sibate de zî 22 cinîyî ameybî qetilkerdene.