Endama Konseya Serekîya Pêroyî ya KCKyî Sozdare Avesta beşdara bernameyê taybetî yê Stêrk TVyî bîye û bi wesîleya Roja Cinîyan ê Kedkaran a Dinya asra rêxistinîye ya cinîyan ercnaye.

Qiseykerdişê Avesta ra beşêk wina ya:

''8ê Adare reyna her cayê dinya de hetê bi hezaran cinîyan ra ame fîrazkerdene. Kurdîstan de zî cinîyî pê hêrs û ruhê serewedaritişî vejîyayî meydanan, vera sîstemê pederşahîye weriştî payan ser. Ma sey cinîyan ê kurdan minetdarê Rayber Apoyî yê ke pê ked û xîretê ey ma resayî na aste.

Têkoşînê cinîyan o tarîxî pê felsefeya Rayber Apoyî bi manadar.  Rixmê hêriş û tedayanê îqtîdarê faşîstî cinîyan bi coşî Tirkîya û Vakurê Kurdîstanî de 8ê Adare fîraz kerd. Cinîyan bi zelalî dî ke ê wayîrê ê hêzê ke eke biwazê eşkenê ser bikewê.

Gerîlayê YJA-Starî bi desan serrî yo koyanê Kurdîstanî de têkoşîn kenê û pê nê têkoşînî cinîyan rê bîyî hêvî. 

Cinîyî hînî pê hîşmendî, rêxistinî û felsefeyêka azade têgêrenê. Ganî her kes ney baş bizanê. Ma pê bawer ê ke coş û rêxistinîya 8ê Adare bi xurtî bidê dewamkerdene û tira netîce bigêrê. Girîng o ke no tablo bi temamî bêro dîyene. No îmkanê têkoşînê hemparî aferneno. Ganî na rewşe pê têkoşînê cinîyan ê hempaarî yê Kurdîstanî bêra tacîdarkerdene.

Camêrdî zî ganî hînî xo newe ra biercnê, sereraşt bikerê, xo nêweşîyanê camêrdîye ra bixelisnê.  Têna bi nê hawayî têkoşînê azadîye yeno kerdene. Wa camêrdî hînî aqil medê cinîyan. Wextê înan hînî qedîya yo. Ma vînenê ke hînî hêzê îqtîdarî xîret kenê têkoşînê cinîyan mîyanê sîstemê xo yê îqtîdarî de bihelînê.

Bêguman cinîyî ney vînenê. Cinîyî hînî hende rêxistinbîyaye yê ke nêkewenê dafika camêrdan. Coka camêrdî wa bi rêzdarî nêzdîyê îrade, rêxistinî û têkoşînê cinîyan bibê. Camêrdî çend bieşkê ney bikerê hende eşkenê xo bixelisnê û gamanê neweyan bierzê.

Têkoşînê azadîye yê cinîyan ê Kurdîstanî na babete de mîsal o. Embazanê ma bedelê giranî dayî û mîyanê têkoşînî de ca girewtî. Tewr peyên Garê de vera planê hukmatê faşîstî yê Erdoganî têkoşîn û çêrîya embaz Şoreş û embazanê ci yê şehîdan rayîrê cuya azade mojna. Coşê 8ê Adare bi hawayêkê pîlî tesîrê çêrîya Garê kerd. Coka ganî her kes wayîrê ci vejîyê.

Newroza emserîne do pê têkoşînêkê pîlî bêra kerdene. Ganî ma vera zulm û zorbazîye apey gamêke nêerzê. Ganî ma nê prosesê Newroze de têkoşîn pîl bikerê û xo zêdêr rêxistin bikerê. Cinîyî do her ca de rayberîya naye bikerê.

Îradeyê cinîyanê Kurdîstanî bi taybetî ê cinîyanê Rojawanê Kurdîstanî do Newroze de bi xurtî xo bimojnê ra.  Têkoşînê 4 parçeyê Kurdîstanî emser Newroze bikerê Newroza azadîya Rayber Apoyî. Ma pê naye bawer ê. Nê prosesî de ganî astengîye nêşinasîye. Ma dî ke 8ê Adare de cinîyan astengîyî rijnayî.

Ez venga pêro cinî, ciwan, dost û kurdan dana ke ruhê 8ê Adare ser o vejîyê meydanan. Ez nika ra Newroza pêro şarê Kurdîstanî fîraz kena. Ez bi taybetî Newroza Rayber Apoyî, embazanê zîndanan, şerwananê HPG û YJA-Starî û milîtanan fîraz kena.''