Parlamenteranê HDP’yî 13, 14 û 15’ê Sibate de, bi munasebetê çalakîya hemsereka KCD’yî Leyla Guvene ya roja 100’yine ya vera tecrîdê Rayberê Şarê Kurdî Abdullah Ocalanî û bi armancê şermezarkerdişê 15’ê Sibate, 15 bajaran ra verê xo açarna bi Amed. Parlamenteran vera pêro astengîyan, hêriş û bendê polîsan derbaz kerdî û xo resna bi keyeyê Guvene yê Amedî. Polîsan xeylî bajaran de hêrişê parlamenteranê HDP’yî kerd û dormeyê înan girewt. Parlamenteran ra Pero Dundare û Salîha Aydenîze kerdî birîndar. Reyna 15’ê Sibate de polîsan linge eşte Salîha Aydenîze ver û a daye bi erd ro.

Salîha Aydenîze derheqê gefanê Serekkomarê Tirkî Erdogan û Wezîrê Karanê Zereyî Suleyman Soyluyî de, derheqê hêriş û tedayê polîsan de qisey kerd û va 13, 14 û 15’ê Sibate de fotografê polîtîkayanê faşîstan ê Tirkîya ameyo antene.

 FIKIR Û CUYA ŞARÎ SER TECRÎD ESTO

Aydenîze bale ante grevanê vêşanîye yê Leyla Guvene û 300 ra zîyadêrî xoverdayoxanê bînan ser û va hetê weşîye ra êdî rîskêko pîl esto. Aydenîze na babete de wina qisey kerd: “Her çiqas ke hetê weşîye ra êdî asta rîskî de bê zî, vera polîtîkayanê şer û kiştişî, reyna zî xo ver danê. Vera tecrîdê Îmraliyî xo ver danê. 3 serranê peyênan de tecrîdê serê Rayberê Şarê Kurdî Abdullah Ocalanî bîyo giran û bi nê tecrîdî kenê ke otorîterîya xo nîşan bidê û vera şarî şer îlan bikerê. Sîstemo ke Îmraliyî de yeno bicaardene, pêroyê welatî ra bîyo vila. Fikir û cuya her kesî ser tecrîd esto.

 WAZENÊ KE KOMELO YEWRENG BÊRO AWANKERDENE

Îqtîdarê AKP’yî bi reya şer û tedayî wazeno ke pêro ray û raybazê demokrasîyî mabên ra bêrê wedaritene û sîstemê saltanatîye yê yewkesî pêt bikero. Sîstemê yewkesî de cayê demokrasîyî çin o. Bi nê sîstemî wazenê ke komelî bikerê yewreng û vengê şarî bibirnê. Naye ra zî hêrişê her hetî kenê. Hêriş û tedayî bi tecrîdê serê Birêz Ocalanî ameyî dest pêkerdene, bi tayînkerdişê qeyûman û bi tepiştena îdarekar û endamanê HDP’yî dewam kenê. Her dem, partîya ma krîmînalîze kenê. 20 rojanê peyênan de se ra zêde endamê ma ameyê tepiştene û tewqîfkerdene. Merdim ke nê hêrişan ra ewnîyeno, vîneno ke sîstemê AKP’yî bîyo binkewte û bi hêrişanê xo yê HDP’yî keno ke xo newe ra bîyaro pêser û linganê xo ser bivindo.   

MA DO ERDÊ NÊ WELATÎ SER, DEMOKRASÎ Û WEŞÎYE AWAN BIKERÊ

Serra 2009’î ra nat, sîyasetê Kurdî ser hêrişî bêmabên dewam kenê. Her çiqas ke rastê hêrişan bêro zî, HDP rêç û xêza xo ya demokrasî û haştîye ra dûrî nêkeweno. Derd û kûlê Erdoganî tena sîstemê yewkesî yo. No sîstem de zî tena qirkerdiş, îşxal, kiştiş û talan esto. Seba nê sîstemî, çi ke destebere ra bêro keno û her çîyê vera xo wazeno ke mabên ra wedarno. La HDP vera zulim, zordarî, teda û bê hiqûqîye, do şarê xo het de mucadele bikero bîyarê Tirkîya.

ÎQTÎDARÊ AKP’YÎ MUCADELEYÊ CINÎYAN RA TERSENO

Îşxalkerî wexto ke dest bi îşxalî kenê, her çiyî ra ver verê xo açarnenê komelî ser. Serkêşê komelî zî cinî yê. HDP zî partîya cinîyan a û naye ra zî hêrişê verênî HDP’yî rê yenê kerdene. Tirkîya de tedayê serê cinîyan restê asta tewr core. Wextê îqtîdarê AKP’yî de tedayê serê cînîyan se ra se bîyê zêde. Her meydan de cinîyî vera teda û hêrişan xo ver danê û sîyaset de cayê xo girewto.  Ma bi hêz û bawerîya xo, îqtîdarî do her tim bikerê aciz û seba cuya azade, xo ver bidê. Mucadeleyê cinîyan, mucadeleyê komelî yo.

31’Ê ADARE DE DO WEÇÎNAYÎŞÊ DEMOKRASÎ Û AZADÎYE BO

Partîya ma do weçînayî de, vera qeyûman ser bikewo. 31’ê Adare seba pêroyê Tirkîya do bibo roja demokrasî û azadîye. Ma do îtîfaqê AKP û MHP’yî mabên ra biwedarê. Îqtîdar bi xo zî naye baş zano û coka wina hêrişê HDP’yî keno û wazeno ke bi nê qeydeyî bibo serkewte. Wa baş bêro zanayene ke xebatkar, endam, hemşaredar, namzet û parlamenterê HDP’yî do, haştîye, azadîye ra fek vera nêdê û seba pêroyê şaranê Tirkîya mucadele bikerê.“