Hemsereka Partîya Herêmanê Demokratîkan Salîha Aydenîze polîtîkaya şerî ya îqtîdarê AKPyî ya ke Kurdîstan de rayra beno ercna.

Aydenîze vist vîrî ke wextê ronayîşê dewlete tirke ra nata vera kurdan polîtîkaya înkar, îmha û asîmîlayonî yena rayraberdene û vat: ''AKP zî na polîka domneno. Zîhnîyetê qirkerdişê dewlete nêbedilya. AKP bi vatişê azadî û demokrasîyî ame îqtîdar la 18 serrî yo ke têna tewirê nê zîhnîyetî bedilnayî. Zîhnîyetê îmha, înkar û asîmîlasyonî dewam keno. Netîceyê polîtîkaya şerî ya AKPyî de tecrîdê serê Rayberê Şarê Kurdî Abdullah Ocalanî 2015 ra nata bi giranîye dewam keno. Wextê pêvînayîşanê Oslo yê 2019î de birêz Ocalanî berpirsîyarîya ke girde girewte la wextê Oslo de zî operasyonê Oslo ameyî kerdene.''

Aydenîze bale ante pêvînayîşanê Îmraliyî yê 2013-2015î ser û wina dewam kerd: ''O proses de qirkerdişê vera cinîyan bîyî kêm, cenazayî nêameyêne, ekonomî bîye hol. Ma nînan rê şahîd bîyî. Her kesî vatêne ke Tirkîya ver bi demokratîkbîyayîşî şina. 3ê çeleyî de pêvînayîşan dest pêkerd 9 çeleyî de Parîs  3 cînîyê kurdê sîyasetmedarî bi destê MÎTî ameyî kiştene. Tirkîya senî ke verî bi JÎTEMî qirkerdişê kerdêne nika zî bi destê hêzanê tarîyan ê JOH-POHÎ qirkerdişan kena.

Tirkîya de çi heyf o ke 10 serran de rayêk derbe beno. Hêzê tarîyî seba ke Tirkîya baxçeyê şaran mebo gureyenê. 7ê hezîrana 2015î de şar eşkera ramot ke îqtîdarê AKPyî nêwezeno. Seba ke AKP hînî nêeşkeno têna îqtîdar bo tecrîdê serê brêz Ocalanî fîna dewre.  Xora ê qerardarê ke polîtîkaya şerî bidê domnayene. Verê Serê Kanî, dima ra 5ê hezîrane de Amed, 20ê temmuze de Pirsûs û 10 teşrîna verêne de Anqara de qirikerdişî ameyî ciwîyayene. Vêveyê kurdan ê Dîlokî de bomba teqaye. Xeylêk qirkerdişî bîyî û 1ê teşrîna peyêne de AKP reyna bi îqtîdar.

Bi bahaneyê derbe OHAL îlan kerd xeylêk dezgehî qefilnayî. Akademîsyen û kedkarî karê xo ra bîyî. Şar bi mexdûr.  Qirkerdişê hîna girdî ameyî kerdene. Qedexeyê kuçeyan ame îlankerdene. 96 şarîdarîyan de qeyûm ame tayînkerdene. Bi desan televîzyon û dezgehê çapemenî ameyî qefilnayene. Qetilkerdişê cinîyan tewr zaf wextê AKPyî de bîyî. Sûrîye û Rojawan de metodê DAÎŞî ameyî şuxulnayene. Wazenê Tirkîya de sîstemê dîktatorîye ronê. Krizê ekonomî, şer, kaos û qirkerdişî ramojnenê ke rewşe wina ya.''

Aydenîzê ard vîrî barê hêzanê mîyanneteweyî zî nê şerî de esta û qiseykerdişê xo wina qedîna: ''Komployê vera Ocalanî 9ê teşrîna verêne de ame destpêkerdene. Reyna 9ê teşrîna verêne de hêrişê Rojawanî kerd.  Seba ke Rojawan de modelê modernîteyê demokratîkî yê Ocalanî esto hêzanê mîyanneteweyî destûr da nê hêrişî. Nê îqtîdarî bê dej, gonî, hesir, şaran rê çîyêk nêard. Her roje rewşe hîna xirabêr bena. Ganî vera nê îqtîdarî têkoşîno hempar bêro kerdene ke ma nê îqtîdarî ra bixelisîyê.''