Dima ke dewleta tirke vera Rojawanî dest pê hêrişan kerd waştişê seba yewîya neteweyîye ya kurdan newe ra bi rojdem. Rojnamegeran û sîyasetmedaranê cinîyan girîngîya yewîya neteweyîye ernnaye.

Wekîla HDPyî ya Mêrdînî Pero Dundar vat: "Ganî kurdî vera hêrişan bibê yew. Şertê nikayînî mecbur kenî ke yewîya neteweyîye bêra caardene. Nika Rojawan de Başûrê Kurdîstanî de îşxal dewam keno. Ganî ma vera qirkerdişan bibê yew. Yewîye bi partîyêke yan zî dezgehêk awan nêbena, ganî çar parçeyanê welatî de her kes seba yewîya neteweyîye bixebito. Şarê kurdî seba yewîya neteweyîye amade yo û ganî hîna zêdêr partîyanê xo ser o teda bikê ke yewîya neteweyîye bêra awankerdene."

Aktîvîsta Têgêrayîşê Cinîyan ê Kurdan (TJA) Meleke Ruşen vat: "Yewîya Neteweyîye ra ber hewceyê kurdan bi çîyêkî çin o. Kurdîstan de statûyê Kurdîstanî yeno astengkerdene. Coka teqez kurdî yewîya neteweyîya xo awan bika."

Vervatoxê Platformê Rojnamegeranê Cinîyan ê Mezopotamya (MKGP) Ayşe Guney vat: "Tarîxî firsendê pîlî viraştî. Eke şima cewabê nînan nêdê, tarîx do şima tasfîye biko. Ganî waştişê şarî, waştişê yewîya neteweyîye bêra caardene. Ma amade yê û ganî pêro rojnamegerê kurdî goreyê nê prosesî têbigêrê."

Hemşaredara Farqînî Naşîde Toprak vat ke her ca de vera destkewteyanê kurdan hêriş yeno kerdene û seba ke verê nê hêrişan bêrê girewtene ganî kurdî yewîya xo awan bikê.

Aktîvîsta TJA Ayşe Gokkan vat: "Ma sey cinîyanê kurdan venga pêro kurdan danê ke ma hînî azadîya xo yewbîyayîşê xo de vînenê. Seba naye ganî pêro partîye, dezgeh û sazgehanê Kurdîstanî bibê yew."