Mêrdîn de domanêke adara 2023yî de raştê tecawuzê merdimê xo N.Ç.yî amebî. Domana ke nê tecawuzî ra digane bîya, 16ê çeleyî de bi îdîaya 'kiştişê qestî' ra tepişîyabî.

Têgêrayîşê Cinîyan ê Azadan (TJA) derheqê tepişîyayîşê domane de verê Zîndanê Mêrdînî de eşkerayîyêke daye. Wekîlê DEM Partî Salîha Aydenîz û Bêrîtane Guneş Altin zî beşdarê çalakîye bîyî. 

Eşkerayîye de pankarta 'Vera tacîz, tecawuzan ma do bêveng nêmanê, wa nê kerdişî bêrê cezzkerdene' ameye akerdene. Vervatoxa TJA ya Mêrdînî Hatîce Oncu eşkerayîye de qisey kerd û dîyar kerd ke dewlete bi biranê xo şîdetê camêrdan teşwîq kena.

Hatîce vat: ''Ma do têkoşînê xo yê vera edaletê camêrdan û polîtîkayanê bêcezakerdişî pîl bikerê. Ma do domana tepişte teyna nêverdê.''

Wekîle Bêrîtane zî ard ziwan ke ê do ferasetê serdestîya camêrdan birijnê. 

Eşkerayîye bi sloganê  "Jin, jiyan, azadî" qedîyaye.