Meclîsê Cinîyan ê DEM Partî ya Severale Ballikaya derheqê weçînayîşanê herêmîyan ê adare de ANFyî rê qisey kerd.

Severale Ballikaya ard ziwan ke karanê înan ê serekeyan ra yew zî caardişê temîlîya têdûşte yo û vat: ''Talankerdişê cinîye metodê talankerdişî yo tewr giran o. Bê azadîya cinîyan azadîya komelî zî mumkîn nîya. Coka rêxistinîya cinîyan û azadîya cinîyan armancê ma yê verên ê. Seba weçînayîşanê herêmîyan sey Meclîsê Cinîyan ê DEM Partî ma xebatanê pîlan kenê. Ma hemfikr ê ke destkewteyanê xo apey bigêrê, peynîya xizanîya cinîyan bîyarê û vera dişmenîya cinîyan a îqtîdarî û polîtîkayanê ci tewirê xo bimojnê.''

Ballikaya vist vîrî ke qeyûman tewr zaf hêrişê dezgehanê cinîyan kerdo û vat: ''Bi tayînê qeyûman destkewteyê cinîyan zî ameyî xespkerdene. Qeyûman xebatê seba cinîyan vindarnayî, merkez û warê cinîyan qefilnayî. Erkê ma yo verên o ke ma pêro destkewteyanê xo weçînayîşanê herêmîyan de apey bigêrê, bi ferasetê îdareyê xo û modelê îdarekerdişê herêmîyî têbigêrê. Ma do pîya çîyo ke cinîyan ra ameyo xespkerdene bigêrê.''

Ballikaya îfade kerd ke Meclîsê Cinîyan ê DEM Partî qerardar o ke xeta azadîgîrîya cinîyan de weçînayîşanê herêmîyan de têbigêro û vat: ''Esasê ferasetê îdareyê herêmîyî cinî yê. Meclîsê ma qerardar o ke şaristanê dostê cinîyan awan bikero. Ma do şaredarîyanê xo qeyûman ra apey bigêrê, krîteranê xo yê hemserekîye û temsîlîya têdûşte bîyarê ca. Ma venga pêro cinîyan danê ke waştişê azadîye, têdûştî û edaletî pîlêr bikerê û muracatê DEM Partî bikerê. Wextê DEM Partî, wextê cinîyan û azadîye yo.''