Vervatoxa Meclîsê Cinîyan ê HDPyî Ayşe Acar Başaran Amed de kombîyayîşê çapemenîye de rojdemê cinîyan ê serra 2020î ercnayî.

Qiseykerdişê Başarane ra beşêk wina yo:

''Serra 2020î îsbatê binkewtişê îqtîdarê AKPyî bîye. Serra 2020î mojna ke polîtîkayanê îqtîdarê AKPyî yê 18 serran dişmenîya cinîyan kerde, kişta cinîyan de gamêke nêeşte û hêrişê destkewteyanê cinîyan kerd.

2020 de prosesê janî reyde bi vatişê 'keye de bimanê' cinîyî merg, vêşanîye û şîdetî reyde têrî mendî. Na serre rîyê polîtîkayanê AKPyî ra bi seyan cinîyî kişîyayî.

Reyna bi polîtîkaya qeyûman vera cinîyan dişmenîye ameye kerdene. Qeyûman dezgehê cinîyan qefilnayî, çend reyna hêrişê Komeleya Rosa û TJA kerd, endamê înan tepişîyayî. Ter peyên zî embaza ma Leyla Guven rehîn ameye girewtene.

Ma sey cinîyan na serre zî meydan, war, Meclîs, keye, çapemenîye û her ca de têkoşîn kerd. ''Serra 2020î bîye a serre ke cinîyê wayîrê destkewteyanê xo vejîyê û înan vengê xo kerd berz.

Goreyê doneyanê rêxistinanê cinîyan 2020 de 275 cinîyan dinyaya xo bedilnaye, 161 cinîyî zî bi hawayêkê şikdarî merdî. 84 cinîyî marûzê tecawuzî, 115 cinîyî maruzê tacîzî û 257 domanî maruzê îstîsmarî mendî.

Ma venga pêro cinîyan danê ke bi rayîrê huqûqî û meşrûyî muracatê her waran bikerê, têkoşînê xo pîl bikerê. Ê wazenê ke ma kuçeyan ra dûrî bigêrê û keyeyan de bikerê heps. Ma dest bidê yewbînan û pîya kuçeyan de bimanê. Îdolojîya ci se bena wa biba ganî pêro cinîyî pîya planê çalakîyan ê lezabezî amade bikerê û pabeyê îqtîdarî nêvindê. Ma eşkenê meseleyan xo bi xo çareser bikerê.  Îqtîdar qestî ra verê kişîyayîşê cinîyan nêgêno.

Wextê îqtîdarî tay mend. Ma do herinda ê wezîrê karanê zereyî yê dişmenê cinîyan de têkoşînê cinîyan ra yewna kese bikerê wezîr. Ma do wezaretê cinîyan awan bikerê û tede beşê şîdetî ronê.

Ma embazanê xo Sêvê, Pakîze, Fatma yê ke 5ê çeleyî de Sîlopî de û 3 embazanê xo yê bînan Sakîne, Fîdan û Leyla yê ke Paris de hetê MÎTî ra ameybî qetilkerdene bi rêzdarî yad kenê. Ma do vera nê polîtîkayanê şîdetî yê MÎT û cergan têkoşînê xo do dewam bikerê.''