Vervatoxa Meclîsê Cinîyan ê HDPyî  Ayşe Acar Başaran rêxistina HDPyî ya Peyasê Amedî de kombîyayîşê çapemenîye kerde. Başaranê qala tengayîya ke cinîyî herêmanê erdlerzî  de ancenê kerde.

Qiseykerdişê Başarane ra çîyêkê vejîyayî vernî wina yê: ''Xeylêk embazanê ma nê prosesî de merdim û dostê xo vînî kerdî. Reyna ronayoxanê Komeleya Cinîyan a Welatperweran û sereka verên a komîsyonê HADEPî, aktîvîsta heqanê cinîyan û merdiman  Melîke Alp zî na felakete de dinyaya xo bedilnaye. Ma do nê rojanê giranan pê paştîdayîşê girdî xo dima biverdê.

Dewlete çîn a, îqtîdar çîn o

Ma sey HDPyî roja verêne ra pêro pîya herêmanê erdlerzî de bî. Mi nê demî de Amed, Semsûr, Mereş û Elbîstan zîyaret kerdî. Ma pêrune dî ke na felaketa girde rîyê erdlerzî ra rîyê kêmayîya îqtîdarî ra qewimîyaye. Cayanê ke ma şîyî, çîyo ke şarî bi tewirê zelalî, bi vengê berzî vatêne no bi, 'Dewlete çîn a, îqtîdar çîn o.' Na raştîye her ca de yena ziwan. Wexê nê kaosî de ez heta Semsûrî raştê yew polîsê trafîkî zî nêameya. Şarî bi îmkananê xo kerdene ke merdimanê xo binê rijnayîşan ra vejo. 24 saetanê verênan de hema awe û nan nêrasabi şarî. Xora rixmo ke 15 rojî ravêrtî ma zanê ke hema zî nê problemî ciwîyenî. Ma şarê xo bêwayîr nêverda. Nika embazê ma Mereş, Riha, Semsûr û Dîlok de mexdûranê erdlerzî rê eleqdar benê. Îqtîdaro ke roja verêne cayê şarî de nêbi, pê qeyûman ame hêrama erdlerzî ya Bazarcixî û destna malzemeyê hetkarî ser.

Ma paştîdayîşî xurtêr bikerê

Nê prosesî de her kesî na felakete ra dej ant la semedê cinîyan hetê bînî nê dejî est ê. Nê eşkenê hewcadarîyanê xo yê xoseran bîyarî ca. Goreyê Fonê Nifusî yê Yewîyanê Neteweyan  herêmanê erdlerzî de tewr tay 214 cinî digan ê û nê cinîyan tewr tay 23 hezar cinîyî do bixelisîyê. Xeylêk nêweşxaneyê rijîyayî û servîsê xelinayîşê cinîyan xizmet nêkenê. Cinîyê diganî û êyê ke gerguşanê xo lewnenê qederê xo rê ameyî caverdayene. Problemanê girdan ê cinîyan ra yew zî tuwaletê gêrok ê. Mekanîzmayo ke cinîyê ke raştê îşkenceyî yenê, şinê ci nêmendo. Ma tîya ra veng danê îqtîdarî, dewlete lezabez nê mekanîzmayî bêrê ronayene. Dahîna zaf ez wazena veng bidê  rêxistinanê cinîyan. Ma torranê hemparan ronê û paştî bidê cinîyan. Cinîyî tersê asayîşî ra şewe bajaranê xeyman de nobete tepişenê.

Ma do hesab bipersê

Ma sey meclîsê cinîyan  HDPyî Êlih û Cizîre ra pîya bi rêxitinanê cinîyan ê bînan, TJA reyde TIRê Morî  şawitî. Grûba Paştîdayîşî ya Femînîstan semedê hetkarîya cinîyan Îstanbulî ra TIRê Morî şaweno, reyna Hatay de kenê ke Xeyma Paştîdayîşî ya More ronê. Wezîfeyê ma pêrun o ke ma paştîdayîşî gird bikerê. Netîceya rantî de bi des hezaran kesî merdî. Îqtîdar vano qeder la ma zanê sîstemê rantî yê îqtîdarî bi sebebê nê mergan. Ewro ma paştî danê yewbînan, birînanê xo pêşenê la êyê ke bîyî sebebê na felakete, ma do înan xo vîr ra mekerê. Ma do hêrsê xo biaçarnê serewedaritişî û hesab bipersê.''