Vervatoxa Meclîsê Cinîyan ê Partîya Demokratîke ya Şaran (HDP) Ayşe Acar Başarane ANFyî rê qisey kerd.

Başarane bale ante polîtîkaya hêrişkare ya AKP-MHPyî  ke semedê domnayîşê îqtîdarê xo rayra benê ser û vat: ''Îqtîdar wazeno heme astenganê vera îqtîdarî birijno ke înan ra yew zî têkoşînê cinîyan o. Coka tim hêrişê îdare, têkoşîn û destkewteyanê cinîyan kenê. Cinîya têkoşêre û azada ke komelî bedilnena ra tersenê. Coka tewr zaf hêrişê cinîyan kenê. Cinîyî rixmê heme hêrişan têkoşînê tewr pîlî rayra benê. Ma destkewteyê pîlî nê prosesan de fînayî dest. Sîstemê hemserekîye, bedilnayîşê ke qanûnê medenî de bîyî, Pêkerdişê Îstanbulî înan ra tay ê ke bi bedelanê pîlan ameyî destfînayene. Cinîyî çirey xoverdayîşî canêverdenê. Zanê ke eke têkoşîn mekerê do vînî bikerê.

Heme prosesanê zemehtan de tim verî cinîyî sere wedarnenê. Bêşik kêmîyê est ê. Ma o hetî ra zî xo rexne kenê la wexto winayên de rixmê îqtîdarê ke wina dişmenatîya cinîyan keno, payramendiş semedê cinîyan zaf muhîm o. Cinîyan bi keda pîle Pêkerdişê Îstanbulî îmza kerd. Cinîyan semedê nê pêkerdişî kuçeyan têkoşîn kerd û do çirey cameverdê. Îqtîdarî pede pede heqê cinîyan xesp kerdî. Heqê nafaka ame munaqeşekerdene. Bi qanûnê înfazî kesanê ke vera cinîyan û domana sûcî kerdî  zîndanan ra ameyî veradayene. Qet yew camêrd nêeşkeno bi nameyê ma qerar bigêro.

Ayşe Acar Başarane bale ante têkoşînê cinîyan ê kurdan ser û vat: ''Ma sey cinîyan ê kurdan hetêkî ra semedê nasname û ziwanê xo têkoşîn kenê, hetê bînî ra zî têkoşînê semedê heqanê cinîyan rayra benê. Cinîyê kurdan bi tecrubeyanê xo yê tarîxîyan û destkewteyanê xo meydan de yê. Nê semedî ra tim hedêfê hêrişan de yê. Embaza ma Salîha, Aysele Tugluk, Semra Guzel, Sebahate Tuncel, Gultene Kişanak û bi desan cinîyê bînî bi têkoşînê xo bîyî hedef. Îqtîdar zano ke têkoşînê cinîyan  komelî bedilneno. Coka tewr zaf hêrişê cinîyan ê kurdan keno. Têkoşînê cinîyan ê kurdan bedilnayîşo komelkî aferna. Cinîyan dinya de reya verêne ajansê cinîyan akerd, bi muneqeşeyanê jîneolojî têkoşînê xo aver berd.

Aysele Tugluk rixmê nêweşîya ci ya girane nîna veradayene. Ma zanê ke meseleya Sahîha Aydenîz zî têna meselaya polîsêkî nîya. Hêrişê vera cinîyan ê kurdan leteyêkê dişmenetîya vera kurdan o.  Hêrişê cinîyan ê kurdan kenê ke înan rê peyser game bidê eştene. Kurdîstan de vera cinîyan polîtîkaya şerî yena rayraberdene. Hukm vera cinîyan sey çuyeyî yeno şuxulnayene. Tecawuzê vera cinîyan sey metodêkî yeno şuxulnayene. Na polîtîkaya bêîtîbarkerdişî ya. TJA seba ke heqanê cinîyan pawena yena muhakemekerdene. Komelo ke ê bi serran o eciqnenê û çîn hesibnenî ra hêzê cinîyan heme dinya de bîyo nimûne. Rojawan de cinîyan têna vera DAÎŞî şer nêkerd, alternatîfêk zî aferna. Vera sîstemê kapîtalîstî formê cuyeyêka newî vet meydan. Nê semedî ra hêriş kenê. Tirkîya de zî cinîyê femînîstî raştê hêrişan yenê la Kurdîstan de no hêriş dilab-hîrlab o.

Başarene vat: ''Îqtîdar pê hêrişan çend xo sey jîhatî ramojno zî peynîya ci nêzdî ya. Komel zî nê vîneno. Pê têkoşînê hemparî ma eşkenê dahîna lez nê îqtîdarî birijnê. Komel bêçare û bêalternatîf nîyo. Rayîrê hîrêyinî est o, hêzêko komelkî est o; nameyê nê HDP yo. Rixmê heme hêrişan payra yo. Sîstemê ko vera ma yeno caardene eke AKP hewteyêk ci rê rî bi rî bimano îqtîdarê înan cade qedîyeno. HDP hêvî yo, coka payra yo.''