Vervatoxa Meclîsê Cinîyan ê HDPyî Ayşe Acar Başaran Merkezê Pêroyî yê HDPyî de kombîyayîşê çapemenîye kerd û rojdem ercna.

Qiseykerdişê Başarane ra beşêk wina yo:

''Ma çarçewa Roja Têkoşînê Vera Şîdetê Serê Cinîyan de çalakî û aktîvîteyê xo ardî ca, vejîyayî meydanan û qirayî. La heyf ke nê mîyanî de şîdetê camêrdan dewam kerd. Menga teşrîna peyêne de 29 cinîyî kişîyayî û 10 cinîyî zî bi hawayêkê şikdarî merdî. Rixmê têkoşînê cinîyan AKP hema zî hêrişê cinîyan keno. Cinîyî prosesê pandemî de zêdêr maruzê şîdetî manenê.

3 rojî verî Colemêrg de domanê bi nameyê Ozcan Erbaşî sey Ceylane Onkol, Muhammed, Furkan, Kemal Kurkut, Îpeke Er hetê hêzanê dewlete ra kişîya. Na polîtîkaya qirkerdişî pê bêceza verdayîşî dewam kena.

Nê hewteyî tewr tay 1000 embazê ma ameyî destbendkerdene. Hemşaredara Cizîre Bêrîvane Kutluya ke herinda ci de qeyûm ame tayînkerdene heta nika 4 caran ameye destbendkerdene û tewr peyên polîsan ci rê gef wend ke wa welat bitrerikna. Bêrîvane Kutlu rê 8 saetan îşkence ame kerdene.

Îqtîdar cinîyanê partîya ma rê sîyasetê demokratîkî herem keno û keno ke bi şîdetî payanê xo ser o vindero. 27ê teşrîna peyêne de tepişteyan vera tecrîdî dest pê grevê vêşanîye kerd. Ma zanenê ke no tecrîd vera ameyoxê Tirkîya yeno kerdene. La îqtîdarî Zîndanê Kandira de eşt koxuşanê embazanê ma ser û bi nê hawayî cewabê waştişê tepişteyan da. Cinîyî mîyanê 4 dêsan de bimanê zî do têkoşînê xo dewam bikerê.

Embaza ma Rojbîne Çetîn kanserê rahîmî ya. Zîndan de a nêna weşkerdene û dermanê ci nêdîyenê. Îqtîdar pê nê kerdişanê xo seke rejîmê îdamî ano ca. Ma reyna îfade kenê ke ganî vera tepişteyan nê kerdişê bêwijdanî biqedê.

Ma sey cinîyan rixmê nê hêrişan têkoşîn û hêvîya xo ra fek vera nêda. Ma no tewirê xo 25ê Teşrîna Peyêne de mojna. La seba cinîyanê HDPyî her roje 25ê Teşrîna Peyên a û her roje roja têkoşînê vera şîdetî ya. Ganî ma vera nê îqtîdarî pîya têkoşîn bikerê.''