Goreyê daneyanê ke Îdareyê Mucadeleyê Hemverê Şidetê serê Cinîyan ê Herêma Kurdistanî 5 menganê verênan ê 2019’î de 89 cinîyan yan xo vêşna yan zî bi vêşnayîşî ameyî kiştene.

Îdareyê Mucadeleyê Hemverê Şidetê serê Cinîyan vat cinîyan bi hawayêkê bigumanî bi vêşnayîşî cuya xo vînî kerda.

Silêmanîye de 33, Hewlêr de 24, Dihok de 19, Germîyan de 1, Raperîn de 8, Soran de 4 cinîyan bi hawayêkê bigumanî yan vêşayê yan zî ameyê vêşnayene û bi nê hawayî cuya xo vînî kerda. Panc menganê verênan ê 2018’î de na hûmare 67 bîye.

5 menganê verênan ê 2019’î de 18 cinîyî ameyî kiştene, 25 cinîyan xo kişt, 49 cinîyan xo vêşna, hêrişo cinsî yo ke hemverê cinîyan de ame kerdene resa 43.

‘Wa ro Ma Bigêrê’

Mesuldara Çapemenîye ya Îdareyo Pêroyî yê Mucadeleyê Hemverê Şidetê serê Cinîyan Rewen Sabire vat, „Dimayo ke xeta gerreyî ya bi hûmara 119 amî akerdene, cinîyan gerreyê xo hîna zaf ardî ziwan. Cinîyî seba ke bieşkê bi rayîranê qanûnîyan heqanê xo bigêrê war o ma bigêrê û gerreyê xo ma ra vajê“.