Vervatoxa Meclîsê Cinîyan ê DBPyî Bêrîvane Bahçecî Buroyê Mişewreyî yê DBPyî yê Amedî de kombîyayîşê çapemenîye kerd, hêrişê vera destkewteyanê cinîyan û têkoşînê cinîyan erjna.

Bêrîvane Bahçecî vat, ''2023 bi têkoşînê cinîyan ê vera îqtîdaranê faşîstan ravîyarte, têgêrayîşê cinîyan ê kurdan îlham dano têkoşînê cinîyan ê dinya. Rixmê heme hêrişanê îqtîdarê AKP-MHPyî cinîyan Tirkîya û Kurdîstan de têkoşînê xo domna.  Dewlete bi destbendkerdiş, tepiştiş û qetilkerdişî hêriş kerd la cinîyan vera tacîzê hukmî hêrsê xo açarna rêxistinbîyayîşî û cewabê polîtîkayanê leyminan ê dewlete da. Destkewteyê Şorişê Rojawanî heme Rojhelatê Mîyanênî rê bîyî hêvî. Hêrişê dewleta tirke yê vera Rojawanî dewam kenê. Wazenê ke verê têgêrayîşê cinîyan ê kurdan bîgêrê.

Bitaybetî wextê AKPyî de cînayetê vera cinîyan zêdîyayî. Seba ke îdeolojîya xelisnayîşî ya cinîyan  vila kerdo yeno waştene ke Têgêrayîşê Cinîyan ê Kurdan ra qesas bêro girewtene. Suîkastê ke vera sêrkêşanê Têgêrayîşê Azadîye yê Kurdan bi Sakine Cansiz dest pêkerd û bi Sevê Demîr, Hevrîne Xelef, Nagehane Akarsel û Evîne Goyîyan dewam kerd polîtîkayanê qesasî yê devlete fînenê çiman ver. Hêrişê vera cinîyan têna sîyasî nê hetê komelkî ra zî ameyî kerdene.

Xora nê qewimîyayîşî pabesteyê tecrîdê serê Rayberê Şarê Kurdî Abdullah Ocalanî yê. Îqtîdaro ke tecrîdî hinî sey metodêk şuxulneno nêwezano vengê Birêz Ocalanî bireso şaran. Înkarê kurdan hema dewam keno. Cinîyê kurdan çar leteyan de vera tarîtîye xebatan rayra benê. Cinîyan na serre bi têkoşînî ravîyarna. Serra newî de zî do semedê pawitişê destkewteyanê cinîyan ma do têkoşînê rêxistinkerdeyî pîlêr bikerê. Serra 2024î de semedê azadîya Rayberê Şarê Kurdî Abdullah Ocalanî û şarê kurdî do têkoşîn bêro xurtkerdene.''