Bi vengdayîşê Meclîsê Cinîyan ê Mizgîne  Şexsê Aylîne Sozen, Selda Taş, Vesîle Donmez û Yasemîne Çetîndag paytextê Swîsre Bern de qirkerdişê cinîyan bi çalakîyêke ame protestokerdene.

Cinîyan çalakîye de sloganê sey 'Qirkerdişê cinîyan polîtîk o', 'Ma şîn nêkenê sere wedarenê' vatî, fotografê cinîyanê ke ameyî qetilkerdene kiriştî.

Çalakîye de nameyê Têgêrayîşê Cinîyan ê Kurdan ê Swîsre ser o Hedîye Munzur qisey kerd. Hedîye ard ziwan ke dewletî paştî danê qirkerdişê cinîyan û pare kerd ke Tirkîya de Erdogan mesuldarê kişîyayîşê cinîyan o. Hedîye vat: ''Kampanyaya ma ya '100 Sebebê Seba Hukmkerdişê Dîktatorî' û têkoşînê ma yê vera qirkerdişan dewam kena.''

Aktîvîsta TJK-E Dîlane Zaza çalakîye de ANFyî rê qisey kerd û venga pêro cinîyan da ke serrgêra qetilkerdişê Sakîne Cansiz, Fîdane Dogan û Leyla Şaylemez de 9ê çeleyî de vejîyê meydanan.

Çalakîye bi sloganê 'Cinîye, Cuye, Azadîye' qedîyaye.