Hasret Bahadire û keyeyê ci 40 serrî verê cû semedê problemanê ekonomîkîyan ra Bedlîsî ra koçê Adana kerd. Hasrete û keyeyê xo taxa Şakîrpaşayî ya qezaya Seyhanî ya Adana de bi ca bîyî û têkoşînê cuye  dest pêkerd. Hasrete pare kerd ke wareyê înan de baxçe, rezê înan estbî û vat, Adana de zî bi tedayan dir ameyî rî bi rî.

 Hasrete wina vat: "Vatî Adana de kar esto, ma zî 40 serrî verê ameyî tîya. A roje ra ma xebityenê. Bajarê ma de erdê ma estbî, la ma uca terk kerd û ma ameyî tîya. Ma tîya zî mîyanê feqîrî de mendî. Werrekna îmkanî bibîyêne, ma şaristanê xo de biciwîyayîne. Çi heyf çin o. Ma tena seba zîyaretî şinê keyeyê merdimanê xo. O zî seba ma baş o."

 Hasreta ke 8 domanê aye estê, 5 kênayê aye zewijnaye yê, Hasrete bi mêrdeyê xo dir têkoşînê cuye dana, bi şiknayîş û pakkerdişê gozan debarê xo kena.

 Hasrete îfade kerd ke kutuya gozan bi 15 TL yo û wina vat: "Ma pak kenê û ma kenê la ro. Vayîya gozan yena 25 TL. Karêko zehmet o. Ma heqdestê keda xo nêgînê. Hîrê lajê mi tepişte yê. Ez wina ewnîyena înan ro. Her roje heta şanî ez xebitîyena. Roje esta qutîyêk roje esta ez di kutuyan pak kena. Heta nîmeyê şewe xebitîyena. Paşta mi dejena. Reyan kênaya mi yena hetkarîya mi. Reyan cîranî. Bi hawayêk pereyê xo qezenc kena."