Hemsereka HDPyî Pervîne Buldan kombîyayîşê Gruba Cinîyan a Parlamento ya partî de qisey kerd. Salona kombîyayîşî de dowîzê sey 'Edaletê camêrdî nê seba cinîyan edaleto raştikên', 'Cinîye, Cuye, Azadîye' ameyî daliqnayene. Endamê Komeleya Rosa, Mayanê Haştîye zî tede xeylêk cinîyî tewrê kombîyayîşî bîyî.

Pervîne Buldan kombîyayîş de qisey kerd û verî 8ê Adare yê pêro cinîyan fîraz kerd.

Qiseykerdişê Pervîne Buldan ra beşêk wina yo:

''Prosesê janî de tewr zaf cinîyan zerar dî. Dewlete pandemî de paştî nêdaye cinîyan û proses seba menfaatê xo xebitna. Îqtîdarê camêrdan de seba holîya cinîyan çîyêk nêna kerdene. Dinya keda cinîyan ser o ronîyaye.

Ma pê têkoşînê xo heqê cinîyan persenê. HDP bêters û bêşik beno vengê cinîyan. Ma do peynîya îqtîdarê talenkerî bîyarê. Ma do kar û nan têna zengînan rê nê şar û cinîyan rê zî vila bikerê. Ma do destûr nêdê ke keda cinîyan bidizîya.

Pandemî de şîdetê camêrdan zî zêdîya. Her roje cinîyêke kişîyena. Hewteyê nê 8ê adare de zî cinîya 92 serre rê tecawuz ame kerdene û cinîye kişîyaye. Mesuldarê na rewşe îqtîdar o. Wezîfeyê îqtîdarî mesajê şermezarkerdişî nîyê. Ganî îqtîdar verê nê cînayetan bigêro û kiştoxan rê ceza bido. Bêcezaverdayîş teşwîq o.

Çalakîyanê 8ê Adare de polîsan hêrişê cinîyan kerd, cinîyî derb kerdî. Hemşaredara ma Dîleke Hatîpoglu rê cigêrayîşo rût ame kerdene. Ma vînenê ke îqtîdar senî hêrişê Peymanê Îstanbulî keno. Nameyê nê kerdişan dişmenîya cinîyan a.

Kurdîstan de zî rewşe wina ya. Derheqê dewayanê hêzanê asayîşî yê vera cinîyan ê kurdan de bira nimite dîyena. Dewlete nê sûcdaran bêceza verdena. Şîdetê vera cinîyan polîtîk o, şîdetê vera cinîyan ê kurdan zî sey polîtîkayêka taybete yena kerdene. Ma do hesabê nê sûcan û zemînanê ci bipersê.

Nika ê qala planê heqanê merdiman kenê. Şima verî qanûnanê bingeyînan, Peymana Îstanbulî, biranê Mehkemeya Heqanê MErdiman a Ewropa bîyarê ca. Îmrali de tecrîdêko pîl esto. Tepişteyî vera tecrîdî 103 rojî yo grevê vêşanîye de yê. Meryeme Soyluya 78 serre û Hatun Aslana 72 serre tepişîyayî. Ma veng danê ke dadîyan vera bidê, peynîya nê zulmî bîyarê. Tek sûcê nê dadîyan waştişê haştîye yo.

Seba tasfîyeya sîstemê hemserekîye bêhuqûqî yena kerdene. Dezgehê ma yê cinîyan yenê qefilnayene. Heqê perwerdeyê bi ziwanê dayîke yeno binpaykerdene. Dezgehê dewlete bi kurdkî xizmet nêdanê. Ê vanê qey eke ê HDP asteng bikerê eşkenê verê têkoşînê cinîyan bigêrê. Ma têkoşînê cinîyan pîl kenê û wazenê destkewteyê cinîyan bipawîyê.

Ez venga pêro cinîyanê parlamento dana ke bêrê ma pîya parlamento bikerê meclîsê cinîyan! Seba qedînayîşê şîdetî ma meseleyan çareser bikerê.

Ez venga pêro cinîyan dana ke pê paştdayîşê HDPyî cewabêkê xurtî bidê dişmenê cinîyan îqtîdarî. HDP destkewteyê têkoşînê cinîyan o. No îqtîdar se keno wa bikero do nêeşko verê cinîyan û HDP bigêro. Cinîyî do HDPyî reyde welat îdare bikerê.''