Hemsereka Pêroyî ya HDPyî Pervîne Buldan Komployo Mîyanneteweyî yê 15ê Sibate yo ke vera Rayberê Şarê Kurdî Abdullah Ocalanî ame kerdene û tecrîdê Îmraliyî ANF rê ercna.

Buldane vat: ''Bi Komployê 15ê Sibata 1999î plan kerd ke Tirkîya de şerê kurdî-tirkî bevejo. Labelê Birêz Ocalanî bi îradeyê xo ya haştîye û çareserîye verê naye girewt. Bi komployî paln kerdbi ke îradeyê sîyasî yê şarê kurdî û meseleya kurdî tasfîye bikerê. Labelê no zî ser nêkewt. Şarê kurdî bi hişmendîya pîle ya sîyasîye û qerardarîye têkoşînê xo yê haştîye kerd û hem Tirkîya de hem zî Rojhelatê Mîyanênî de bi hêzê vurnayîşî. Komplo nika bi tecrîdî dewam keno. Bi padayîşê berê Îmraliyî ê xîret kenê ke waştişê azadîye, haştîye û demokrasîyî yê şaran tecrîd bikerê. Demokrasî, huqûq, edalet ame tecrîdkerdene. Coka wedaritişê tecrîdî, akerdişê berê Îmraliyî û dîyalogê demokratîkî seba çinkerdişê komployî wezîfeyêko mecbûrî û tarîxî yê ma pêroyînan o.

Eke prosesê çareserîye nêameyêne qedînayene, eke dîyalogê demokratîkî û gamê haştîyaneyî nêameyêne astengkerdene, eke înan goş bidêne Ocalanî bi atmosferê haştîye û potansîyelê çareserîye vayê demokrasîyî Rojhelatê Mîyanênî de bi taybetî Sûrîye de do veng bidayêne. Astengîya tewr pîle ya ke nika verê haştîya Sûrîye gêna tecrîd o. Tirkîya fatisîyena. Vînayîşê Ocalanî bîyî rast. Îqtîdar Îdlîb de bin keweno. Seba ke Îmrali de dîyolagan nêkenê her roje ya Washington de yê yan zî Moskova de yê. Rayîrê çareserîye eşkera yo; akerdişê berê Îmraliyî, akerdişê rayîrê dîyalogan.Nê mabênê 10 rojan de eşkenê atmosfer bivurnê û kenê ke Tirkîya de û Sûrîye de proseso demokratîk dest pêbikero.

Bi têkoşîn û xoverdayîşê pîl yê 21 serran îsbat bi ke Komployo Mîyanneteweyî ser nêkewt. Êyê ke polîtîkaya şerî û tecrîdî ra netîceyan pawenê mîyanê şaşîtîyêka pîle de yê. Tirkîya nika hetê ekonomîkî ra, sîyasî ra û komelkî ra çin bena. Semedê naye zî sîyasetê nêçareserîye yo. Eke Tirkîya xo meseleya kurdan, meseleya demokrasîyî û edaletî ra dûr bigêra, darde û krîzê hîna pîlêrî do bivejîyê verê Tirkîya. Ganî Tirkîya hînî naye ra fek vera bida. Êyê ke meseleya kurde, meseleya demokrasîyî çareser nêkenê ganî meydan biteriknê. Şarê Tirkîya bêçare nîyo, mecbur nîyo ke bi faşîzmî biciwîyo, bêalternatîf nîyo. Alternatîfo demokratîk o ke HDP viraşt berê tarîxî yê prosesê îqtîdarê demokratîkî akeno.''