Endama Platformê Cinîyan ê Anqara Buse Uçer derheqê rewşa cinîyan ê ke binê tesîrê erdlerzî de mendî de ANFyî rê qisey kerd.

Uçere ard ziwan erdlerz açarîya yew felakete ke do çirey mero vîrakerdene û vat: ''Nê erdlezî de eslê xo de îqtîdar binê rijnayîşî de mend. Tewr zaf vengê 'dewlete ha ça' bi berz. Wextê tewr muhîmî de semedê xebata xelisnayîşî û caardişê hewcedarîyanê mexdûranê erdlerzî dewlete meydan de çînêbî. Îqtîdarê AKPyî Tirkîya de rejîmê mutehîtan nayo ro. Eslê xo warê rantî ameyo afirnayene. Çîyo ke gerek ma ser vinderê oyo ke merdimî waranê erdlerzî de serd û vêşanîye ra merdî. Na felaketa girde rehet rehet vîrê komelî ra do nêşiro. Goreyê hûmara fermî nizdê 50 hezaran kesan dinyaya xo bedilnaye ke zafê înan eşkayêne bi xebeta bitesîrî bêrê xelisnayene. Mîyanê nê rijnayîşî de sosyalîst, welatperwer, femînîst û rêxistinê averşîyayeyî vejîyayî vernî û ruhê paştîdayîşî kerd komelkî.

Erdlerzî tewr zaf tesîrê cinîyan tutan kerd.  Felaketa des serran a AKPyî tew zaf tesîrê ma cinîyan kena. Hewcedarîyê cinîyan hetê dezgehanê cinîyan ra yenê caardene. Cinîyî seba ke miqatê tutan benê, barê înan dahîna giran o. Wina yew waro ke cinîyî nêeşkenê xeyman zî bifînê dest, coka her hetî ra verê şîdetî yeno akerdene. Zaf cinîyî pîya bi camêrdanê ke înan rê şîdet kenê eynî xeyman de manenê, tay cinîyê bi waştişê camêrdan bananê xesarin de manenê. Tena xeyman de nê cinîyê ke ameyî bajaranê girdan zî problemê înan est ê. Xeylêk cinîyî vînîbîyaye yê. Dewlete herinda pawitişê şarî de hêzê xo semedê tersnayîşê şarî şuxulnena. Vera faşîzmî seferberîya şaran birînanê edlerzî pêşeno.

Ma ewro sey cinîyan vanê ke şînê ma bezreyê  serewedaritişê ma yo û vejîyenê waran. Ma do semedê hesabpersayîşî têkoşînê xo bidomnê. Ma do kuçeyan bi vengê berzî  semedê înanê ke tîya de û do hinî tîya nêbê, bigîrê. Wa biciwîyo 8ê Adare.''