Komeleya Kultur, Hetkarî û Averberdişî ya Gêxî, Dep, Azarpêrt, Xorxol û Çêrme (KAYY-DER) qezaya Umranîye ya Îstanbulî de seba namzedanê çewlîgijan ê Partîya Çep a Keske aktîvîteya daşinasnayîşî kerde. Xeylêk çewlîgijê ke Îstanbul de û dormeyê ci de ciwîyenê tewrê aktîvîte bîyî.

Aktîvîte de Namzedê Îstanbulî Tuncay Gokçe, Husnu Balkan, Bekîr Kirici; Namzeda Kastamonuyî Berrîne Selbus, Namzeda Îsparta Nurtene Karagoz, Namzeda Çewlîgî Cemîle Turhalli Balsak dîyayî şinasnayene.

Aktîvîte de hêverî Hemserekê KAYY-DERî Ahmet Tuzunî mesajê Îdrîs Balukenî wend. Mesajê xo de Balukenî venga şarê Çewlîgî da ke weçînayîşan de bi destekê namzedanê xo rolê xo bîyaro ca.

Namzeda Çewlîgî Cemîle Turhalli Balsak aktîvîte de bi kirdkî qisey kerd û vat: ''Ma ganî her ca de bi ziwanê xo qisey bikerê. Nika partîyanê bînan ma ra dî û meydanan de bi kurdkî qisey kenê. Ma wayîrê cografyaya tewr rinde yê la cografyaya ma bêmerdiman verdaye. Înan zîret, heywankarîye, ekonomî qedînayê. Çewlîg şaristananê tewr xizanan ra yew o. Nê polîtîkayî rîyê îqtîdarî ra yê.''

Cemîle polîtîkayê qirkerdişî yê vera elewî û kurdan rexne kerdî û vat: ''Nê weçînayîşan de elewîyî do sey elewîyan, kurdî zî do sey kurdan têbigêrê. Coka nê weçînayîşî hende girîng ê. Nê weçînayîşî do bibê weçînayîşê pêro cinî, kurd, elewî û ê bînan. Şima do nê tarîxî binusê. Çunke Çewlîg do raya verêne wekîlêka cinîye vejo.''

Namzedê Partîya Çep a Keske yê Îstanbulî Tuncay Gokçeyî zî vat: ''Partîya Çep a Keske zerrîya şarî de textê xo viraşto. Ma do verê îqtîdarê AKP-MHPyî de çok nêşorê erdî ro. Çewlîgijî do cewabê nê îqtîdarî bidê. Ma do 14ê gulane de roşanî dîyarîya şarê xo bikerê.''