Baroyê Cinîyan ê Kurdan ê s eba Aştî (CENÎ), seba cinîyî yewbînan nas bikerê paytextê Almanya Berlîn de çalakîyêka kulturî viraşte.

Çalakîye de resimê Zehra Dogan ameyê mojnayene, filmê ‘Dûr o?’ yê Leyla Toprak ame temaşekerdene û Nergez Dlo zî deyîrê xo vatî.

Şewa kulturî de ke Akademîsyene Şermîne Guven moderatorîye kerd, seba vîrardena şehîdanê têkoşînê azadîye deqayêk rêz ame girewtene.

Tarîx do hetê cinîyan ra binusîyo

Solîne Janya behsê karanê CENÎ kerd û vat, ‘‘Ma vera şer ê. Ma vera serdestîya camêrdan ê. Cinîyî do tarîxî binusê. Serra 1923î de bi peymanê Lozanî Kurdîstan kerd çar parçe. Nê peymanî ra dima ewro xeylê însanî kurdan sey tirkê koyî zanê. Eke tarîxê to çin bo, muhîm nîyo ke ti kam î û kamcayî ra ameyî. Têgêrayîşê Cinîyanê Kurdan xo bi hewaêko xoser rêxistine keno. Coka refleksê xo bi ewnîyayîşê cinîyan o.

‘Ma muhîmîye danê têkoşînê azadîye’

Susanne Rossling zî behsê kar û awanbyayîşê CENÎ kerd û vat, ‘‘CENÎ hetê cinîyanê tirk û kurdan ra ameye awankerdene. Seba cuyêka alternatîfe ya Rojhelatê Mîyanênî xebitêna. Sey enternasyonelîstêke ez zî beşdarê Têgêrayîşê Cinîyanê Kurdan bîya. Ê têgêrayîşî serra 1993î de mohrê xo da binê artêşbîyayîşê cinîyan ro. Ma vera qirkerdişê cinî, vera zewicnayîşê domanan ma têkoşîn kenê.’’

Qiseykerdişan ra dima fîlmê ‘Dûr o?’ yê Leyla Toprak ame temaşekerdene.