Koalîsyonê Cinîyan ê Rojnamegerîye (CFWIJ) derheqê îdîaya 'endamîya rêxistine' ya vera muxabîra Jinnews Şehrîban Arî, rojnamegere Nazane Sala û muxabîra Ajansê Mezopotamya (MA) Zeynepe Durgut de eşkerayîyêke daye. Dezgehî îdîaname şermezar kerd û waşt ke cade pêro rojnamegerê tepişteyî bêrê veradayene.

Dezgehî pare kerd ke ê nêzdî ra rewşa Arî û Sala teqîb kenê û vat: ''Ma pare kerdbi ke nê rojnamegerî korîdaran de ameyî kaşkerdene, maruzê îşkenceyî bîyê. Rojnamegerê MA zî tim maruzê teda û zorbazîyan manenê. Rojnamegerê Jinnewsî zî tim hedefê îdîaya 'endamîya rêxistine-propagandaya rêxistine' de yê. Pê destbendkerdiş, tepiştiş û metodanê bînan yeno waştene ke rojnamegerî karê xo ra fek vera bidê. No hêriş vera çapemenîya azade ya. Embazê ma Şehrîbane Arî û Nazane Sala bêsûc ê.''