Kadrîye Gerçeka 70 serre Wan de nêweşxaneyêkî ra taburcu bîye. La Kadrîye Gerçek sey 'merde' ameye qeydkerdene Dayîke Kadrîye seba ke îsbat bikera 'ha ciwîyena' muracatê Serdozgerîya Komare ya Wanî kerd.
Wan de Kadrîye Gerçeka 70 serre dima ke krîzê qelbî derbaz kerd wedarîyaye Nêweşxaneyê Perwerde û Cigêrayîşî yê Wanî. 2 mengan ra dima Kadrîye Gerçek taburcu bîye.
Lajê Dayîke Kadrîye wexto ke pê nasnameyê dadîya xo dermangehî ra derman girewtêne musayo ke dadîya ci sey 'merde' asena. Lajê Kadrîye muracatê avûkate Rojhat Levent Ozgokçeyî kerd. Avûkat Ozgokçeyî netîceya cigêrayîşî de dî ke Dayîke Kadrîye nêweşxane de sey 'merde' ameya qeydkerdene.
Dayîke Kadrîye rîyê rewşe ra nêeşkenê meaşê kokimîye bigêra, dermananê xo bigêra. Avukat Ozgokçeyî vat: ''Ma seba mexdûre Kadrîye Gerçek muracatê Serdozgerîya Komare ya Wanî kerd. Nika ma hê xîret kenê ke îsbat bikerê 'Kadrîye Gerçek ha ciwîyena.' Ma wazenê ke berpirsîyaranê nê karî wa bêrê tesbîrkerdene. Ma do dewa teqîb bikerê.
Dayîke Kadrîye zî ard ziwan ke nêeşkena dermananê xo zî bigêra û vat: ''Dewlete vana ke ez merda la ez ha ciwîyena. Ma do mehkeme de naye îsbat bikerê.''
