Tehlukeyê cuya Evîne Kanli ya ke hetê polîsan ra ameye birîndarkerdene dewam keno. Dayîka Evîne, Fatma Kanliya ke vera polîsan hêrsê xo ard ziwan  vat: “Beno ke kênaya mi dinyaya xo bi bedilne.

27ê teşrîna peyêne de Evîne Kanli Taxa Kumbêtî ya Norşînê Bedlîsî hetê mêrdeyê ci ra rehîn ameye girewtene û badê çeke şuxulnayîşê polîsan bi giranî birîndar bîye. Mêrdeyê ci Ferît Kanli zi şenik bi birîndar. Kanli servîsê ciewnîyayîşê giranî yê Merkezê Tibî yê Dursun Odabaşî yê Unîversîteya Yuzuncu Yilî de têkoşînê cuya dana. Doktoran vat înan çar reyî Kanli amelîyat kerda û teylukeyê cuye hema esto.

Dayîka Evîne Kanli, Fatma Kanli seba ke polîsan kênaya ci reyna berde cayê camêrdê hêrişkarî hêrsê xo ard ziwan û vat: ''Kênaya mi hetê camêrdê ke ey dir zewijnayîbî xeylêk rey raştê şîdetî ameye. Ma gerreyê ey kerd. Polîsan ma ra vat, 'mîyanê keyeyî de çareser bikerê'. Evîne reyna peyser berde cayê camêrdê hêrişkarî. Mi kênaya xo berde Îstanbul cayê keyeyê de xo ca kerd.

Mêrdeyê ci tim a tehdît kerdêne. Roja qewimîyayîşî zî Evîne Norşîn de keyeyê pîrikê xo de bî. Polîsî ameyî pêzorî berde ke wa mêrdeyê xo îkna bikero. Polîsan soz da ma vat do çîyêk aye mebo. La kênaya mi bîye birîndare. Polîsan seba ke mêrdeyê ci teslîm bigerê kênaya mi şuxulna. Kênaya mi bi destê xo berde, zanayêne ke a zere de ya rixmê naye keyeyî ser guleyî varnayî. Şahîdî zî estî. Polîsan kênaya mi kerde birîndare.  Ferît Kanli û merdimê ci ma bi mergî tehdît kenê. Polîsan kênaya mi senî berde cayê nê zalimî. Kênaya mi nika gangêş de ya. Beno ke ma aye vînî bikerê. Dewlete qey da kênaya mi ro?''