Pêroyê endamê keyeyê Toptekînê ke serra 1990 de dewa înan ameye vêşnayene û koçê Sûrî kerd, rastê tedaya û şîdetê dewlete ameyî. Herdem Toptekîne vana ke çîyê ke ma antî wa şarê Rojawanî meanco û semedê wayîrvejîyayîşî veng dana.

Polîtîkayanê gemarin ê dewleta Tirkî ra serra 1990 de bi seyan dewê Kurdistanî ameyî vêşnayene û wêrankerdene. Dewa Kûyê ya Pasûrî ya Amedî zî nê dewan ra yew a. Hemwelatijê dewa Kûyê serra 1990 de tedaya û şîdetê zorbazîya dewlete qebûl nêkerd û seba ke waştişê dewleta îşxalkare nêard ca dewa înan ameye vêşnayene. Keyeyê Toptekînî zî serra 1990 de Sûrê Amedî rê koç kerd, para xo terorê dewlete ra girewte û pêroyê cuya keyeyî sey multecîyan vîyarte.

Cinîya bi nameyê Herdem Toptekîne (56) serra 1963 de dewa Şawişan a Pasûrî de ameye dinya û serra xo ya 16'ine de zewijîyaye û sey veyve şîya dewa Kûyê. Toptekîne ajansê ma rê zehmetîya ke ante, û qijkekîya xoya ke dewa Şawişan de vîyarte ra behs kerd. Qijkekîya mi dewe de vîyarte, mi cuya dewe ra zaf hes kerdêne, labelê îşxalkaran bi zorbazîye kerd ke ma koç bikê. Dewa ma Şawişan dewêka welatperwer bîye. Serra 1990 de seba ke ma tedaya û kerdişê dewlete qebul nêkerdî, keyeyê ma ameyî vêşnayene û ma neçar mendî ke koç bikê Sûrê Amedî. Bi serran dewlete ma rê zulm kerd, ma cuya xo ya aramîye ra kerde. Lajê mi 9 serre verê cû bi hewayêkê bêguneyî ame destbendkerdene û tepiştene. Lajê mi nika binê şert û mercanê zoran de yeno tepiştene û zîndan de zafê nêweşîyî tede payda bîyî. Pêroyê endamanê keyeyê mi terorê dewlete ra para xo girewte. Çend serran ra nata ma cuya multecîyan ciwîyenê.Ez do qet verê zulmê dewlete de milê xo çewt nêkera. Senî ke serra 1990 de ma dewa xo ra ameyî vetene, nika zî şarê Rojawanî yeno koçkerdene. No zulm o, îşxalkarî yo. Ganî her keso ke erdê xo ra ame koçkerdene û Kurdistan de ciwîyayêne, verba nê zulmî vindero. Ganî her merdim şarê Rojawanî reyde ca bigêro û veng bide vengê şarê Rojawanî."