Hukmato federal o ke bi serekwezîrîya Angela Merkele yeno îdarekerdene, rixmê vengdayîşanê îdareyê Rojawanî de zî çeteyanê DAÎŞ’ijan ê Almanan ê ke destê hêzanê YPG/QSD’yî de yê nêwazeno û seba muhakemekerdişê înan çîyêk nêkeno. Zîndan û kampanê Rojawanê Kurdistanî de, zafaneyê înan cinî û domanî, 200 hemwelatijê Almanî yê DAÎŞ’ijî estê. La îdareyê Berlînî hemverê nê de bêveng û bêxem o.

Federasyonê Meclîsê Cinîyan ê Êzidîyan yê Almanya, rîyê na bêxemîya hemverê Almananê ke Rojawanê Kurdistanî, Başûrê Kurdistanî, Sûrîye û Iraq de sûcê merdimîye kerdê, gerreyê wezîranê hukmatê Merkele, wezîra Edaletî Katarîna Barleye û wezîrê Karanê Zereyî Horst Seehoferî kerd.

Cinîyan ê Êzidîyan da zanayene ke her di wezîran seba muhakemekerdişê çeteyanê DAÎŞ’î nêkewtî mîyanê têgêrayîşêk, naye ra vernîya bicaameyîşê edaletî de asteng ê. Gerrenameyî de vengdayîşê îdareyê Rojawan û Vakurê Sûrîye yê seba muhakemerdişê çeteyanê DAÎŞ’î ameyî vîrvistene û bale ancîyaye serê qirkerdişanê DAÎŞ’î yê hemverê Êzidîyan, xusûsen zî sûcê ke hemverê cinîyan de ameyê kerdene.

Cinîyan ê Êzidîyan gerrenameyî de bale ante serê maddeyê 258’inî yê Qanûnê Bingeyênî yê Almanya ke goreyê nê maddeyî vernîgirewtişê muhakemekerdişê sûcdaran sûc o. Goreyê maddeyo ke bale ancîyaya ser; kesê ke bicaameyîşê edaletî asteng bikerê heta 5 serran cezaya zîndanî û cezaya pereyan dîyena înan. Nê mabênî de vervatoxêkê Wezaretê Edaletî persê kanalê televîzyonî yê WDR û NDR’yî yê derheqê babete de bêcewab verdayî û vat ke na babete de do eşkerayî nêdo.