Bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan ya Dinya seranserê dinya de cinîyî amadekarîya çalakîyan û aktîvîteyan kenê. Cinîyan ê Dêrsimî zî semedê tewrbîyayîşê çalakîyan veng da.

Guneşe Dogan bale ante keda cinîye û bipaykedişê heqê ci ser û vat:  ''Ma neheqîye qebul nêkenê û wayîrê heqanê xo vejîyenê. Ez cinî û mayêke vera şîdetî ya wa ganî şîdet nêro kerdene. Mi rê zî sey xeylêke cinîyan ê bînan hem keye de hem teber de zext ame kerdene. Vanê wa cinîyî rixmê heme hêrişan hîş bikerê, vengê xo mevejê. Nê ma vera şîdet û neheqî bêveng nêvendenê. Roja vera şîdetî de ez zî do çalakîye de bî.''

Ferîde Kit zî bale atne de cinîyî senî bedelanê pîlan danê û nê vatî:  "Ez bi xo zî bi serran o vera şîdetî wareyan de têkoşîn dana. Ewro tepîya zî ez do têkoşînê xo rêdewam bikerî. Panc hezar serrî yo ke camêrdî serdest ê. Ma zî semedê şîdetê camêrdan bedelanê pîlan  danê. Ganî  vera şîdet vejîyê kuçeyan. Dêrsim de şîdetê vera cinîyan zêdîyeno. Ez do vera şîdetî waran de bî. Ganî heme cinî wayîrê 25 Teşrîna Peyêne vejîyê.''

Îlknure Dogan zî  şîdetê camêrdan ê vera cinîyan vist vîrî û best pa: " Ez çend serrî yo ke tewrê çalakîyanê 25ê Teşrîna Peyêne bena. Her kes ma cinîyan ê Dêrsimî sey azad vîneno. La ma azad nîyê. Azadîya ma tena bi kincanê ke ma kenê piray û ma serqotîye yena ercnayene. Cinîyî seba ke babî, bira û mêrdeyê xo ra tersenê bêrê çalakîyan. Ez  bawer nêkan ke cinîyê dêrsimijî azad ê. Xebera cinîyan nasnameyê înan ra çin o. Ganî tewr zêde têkoşîn bêro dayene. Dezgehê têkoşînî yê cinîyan zî kêm ê, qîm nêkenê. Semedê pîlkerdişê têkoşînî ganî dezgehî bêrê xurtkerdene.''

Evrîme Dag zî ard ziwan ke ganî têkoşînê vera şîdetî bi rojêke sînordar nêbo û vat: "Tena 25ê Teşrîna Peyêne de nê ganî ma her wext waran de bê. Eke ma bi rojêke sînordar bikerê qîm nêkeno. Eke ma bi rojêke sînordar bikerê dimayê 25ê Teşrîna Peyêne ma do agêrê keye û do reyna raştê bêrê. Ma wazenê ke wa peynîya şîdetî bêro. Tay cinîyî bi cesaret têkoşîn kenê la tay zî tersenê û bêveng manenê. Ez o 25ê Teşrîna Peyêne de waran de bî. Wa heme cinî bi cesaret vejîyê kuçeyan.''