Bi seyan cinîyan dezgehanê mîyanneteweyîyan rê û Sekreterê Pêroyî yê NYyî Antonio Guterres, Serekê Konseya Ewropa  António Luís Santos da Costa û Sekreterê Yewîya Ereban rê mektube nuşte.

Mektube de ame vîrvistene ke 8ê kanûna 2024î de rejîmê Baasî yê Sûrîye rijîya la naye ra pey zî hêrişê dewleta tirke ya îşxalkere yê vera Rojawanî bi giranî zêdîyayê. Cinîyan bale ante ser ke dezgehê mîyanneteweyîyî vera hêrişanê dewleta tirke ya îşxalkere û çeteyanê ci de bêveng ê û no zî hêz dano dewleta tirke. 

Cinîyan bale ante ser ke Şorişê Rojawanî reyde cinîyanê Rojawanî bi aktîfî şerê vera DAÎŞî de cagirewt, yewinê xo yê sey YPJyî awan kerdê û Îdareyê Xoserî de cinîyî bîyî wayîrê rolî. Cinîyan mektube de da zanayene ke ganî modelê Îdareyê Xoserî yo ke têdûştîya cînsîyetan esas keno ganî pêro Sûrîye de bêro caardene.

Cinîyan mektube de veng da ke wa Îdareyo Xoser bişinasîyo, Tirkîya rê hinî çekî nêrê rotene û komelo demokratîk bêro destekkerdene.

Cinîyan vat: ''Wextê ci yo ke modelê sey Îdareyê Xoserî Rojhelatê Mîyanênî de bêrê destekkerdene û paştî bêra dayene cinîyan ke seba azadî û demokrasîyê Sûrîye!''