Meclîsê Cinîyan ê DEM Partî bi slogana  ''Dema Jinan, Vîna Jinan -DEM Jiyan e!''  Parka Kugulu ya Anqara de startê 8ê Adare û kampanyaya weçînayîşî ya Namzeda Şaredarîya Bajarê Pîlî ya Anqara ya DEM Partî Gultane Kişanak da. Femînîstê xoserî û Meclîsê Cinîyanê DEM Partî yê Anqara û Konya ra cinîyî tewrê aktîvîte bîyî.

Vervatoxa Meclîsê Cinîyan Halide Turkoglu vat, ''Gereka Gultana Kişanak cede bêro verdayene û kampanyaya weçînayîşî bi xo rayra bêro.''

Halide Turkoglu vist vîrî ke Gultane Kişanak zîndarî ra vat, ''Ma eşkenê bikerê, ma eşkenê ser bikewê, ma eşkenê nê sîstemî bibedilne''  û nê vatî: "Sere de geraka polîtîkayê şerî bêrê caverdayene. Çunke nê polîtîkayî benê sebebê caardişanê antîdemokratîkan. Nê polîtîkayî kede û heqê ma yê cuye xesp kenê. Amed, Êlih û xeylêk bajaranê bînan bi hewayêkê sîstematîkî qeyûmî ameyî cakerdene. Gultane Kişanak Amedî ra mesaj dana Anqara. Gama ke a Hemşaredara Bajarê Pîlî yê Amedî bî ameye rehîngirewtene. Nika namzeda Anqara ya. Vana ke, 'eke ez eşkena bibê namzede şima qey herinda mi de qeyûm ca kerd, qey ez inkey zîndan de ya'. Cewabê nê persî her kes perseno. Gulatane Kişanak wazena modelê îdareyanê cayîyayan bîyarê Anqara.  Îqtîdar hêrişê destkewteyanê cinîyan keno ma zî xoverdayîşî rê dewm kenê.  Ma do nê weçînayîşî de sîstemê xo yê hemserekîye her ca de bîyarê ca. Ma pîya bi Gultane Kişinak semedê îdarekerdişê bajaran yenê. Paşta Gultane Kişanak cinîyan ra pêt a, a pê bawer a ke cinîyî do nê sîstemî bibedilnê.''

Badê qiseykerdişê Turkoglu Hemvervatoxa Komîsyonê Karanê Teberî  Ebru Gunay mektûbo ke Gulatane Kişanak cinîyan rê şawit wend.

Mektubê Kişanake wina yo:

"Cinîyê sînayeyî;

Ez sere de şima cinîyan ê aqarayijan bi hesret selam kena, şima rê serkewtiş wazena. Ma ewro startê kampanyaya xo danê. Ez pê bawer a ke ma  nê prosesî de hêzêko xurt vejê werte. Inkey Anqara de wextê DEMî yo. Inkey wextê wayîrvejîyayîşê DEMê Morî yo. Ma semedê bedilnayîşê rîyê Anaqra yê camêrdê serdestî yenê. Seba ke cinîyî bibê wayîrê qale û qerar bigêrê ma yenê. Ma semedê vergirewtişê polîtîkayanê şerî, darbeyanê qeyûman û serdestîya camêrdan kewnê rayîr. Ma semedê ardişê haştîye yenê. Seba ke ma Anqara zîhnîyetê rijnayoxî ra bixelisnê ma kewnê rayîr. Ma semedê xurtkerdişê têkoşînê demokrasî û azadîye, semedê wayîrvejîyayîşê keda kedkaran kewtî rayîr. Seba ke barê cinîyan û feqîran şenik bikerê ma yenê. Seba ke ma ferqê îdarekerdişê cinîyan ramojne ma yenê. Seba ke ma şarê Anqara rê alternatîvêka demokratîke teqdîm bikerê ma yenê. Ma pîya bi cinîyan ê kedkaran, ciwanan û cinîyê ke wazenê ferq biafirnê kewtî rayîr. Ma semedê înşakerdişê demokrasî, haştîya komlekî û azadîya cinîyan yenê.

Cinîyê sînayeyî bizanê ke ez tim cayê şima de ya. Ez şima zerrîya xo de hîs kena, şima ra hêz û moral gena. Ez zana ke şima paştî danê mi û  bi hewayêkê hêzdarî mi temsîl kenê. Gultanêke zîndan de ya la bi hezaran Gulatanî kuçeyan de yê. Bi hezaran Fîgene, bi hezaran Sebahate bi hezaran Ayla û bi hezaran cinîyê bînî tewrê têkoşînê azadîye yê cinîyan benê, serkêşîye kenê. Ma do bi têkoşînê xo yê kolektîf û keda xo ya kolektîfe ser bikewê. Paştdayîşê cinîyan do ser bikewo. Rayîrê şima, rayîrê ma akerde bo. Rayîrê ma wa azadîye, demokrasî û haştîye rê vejo.Jin, Jiyan, Azadî!"