Cinîya kurde Yasemîn Çetîndag 23ê kanûne de verê çimanê domananê xo de hetê Savaş Ozyanikî ra kişîyabî û 28ê kanûne de şaristanê Strasborugî yê Fransa de amebî definkerdene.

Înîsîyatîfê Cinîyan ê Zîne bi merasîmêke Yasemîne yad kerde. Keyeyê Yasemîne zî tewrê merasîmî bi. Waya Yasemîne Leyla Çetîndag pare kerd ke waya ci domananê xo û cuye ra zaf hes kerdêne û dejê keyeyî derbaz nêbeno.

Aktîvîsta Însiyatîfê Cinîyan ê Zîne Meryeme Tekîner zî ard ziwan ke cuya azade û têdûşte têna hetê cinîyan ra do bêra ronayene û seba ke cinîyî azadîye wazenê yenê kiştene.

Cinîyan venga her kesî da ke roja hukmkerdişê Savaş Ozyankiyî de tewrê roniştişê mehkeme bibo.