Îzmîr de Platformê Cinîyî Pîya Bihêz ê seba Gulîstane Dokuya ke 5ê çeleyî ra nata vînbîyaye ya verê Merkezê Kulturî yê Turkane Saylan de eşkerayîya çapemenîye kerde. Eşkerayîye de pankarta ''Gulîstane Doku ça de ya?'' ameye akerdene û sloganê ''Cinîyî Pîya Bihêz ê'' û ''Ma ra kesêk zî do kêm nêba'' ameyî vatene.

Zaf cinîyî tewrê eşkerayîye bîyî. Eşkerayîye hetê Îdarekara Şubeyê Îzmîrî ya Komeleya Heqanê Merdiman (ÎHD) Cemîle Karakaya ra ameye wendene.

Karakaya îfade kerd ke cigêrayîşê seba Gulîstane zaf tay ê û polîsî her çiqas îhtîmalê xokiştişî ser o vindenê zî tay dîmenê kamera mojnenê ke Gulîstan bi zorî dayîye dekewtene wesayîtêke. Karakaya ard ziwan ke ê wazenê tehqîqatê Gulîstane yewîna polîsan a ke babîyê gumandar Zeyînal Abarakovî tede polîs o ra bêro girewtene û sewbîna yew yewîne tehqîqat dewam bikera.

Karakaya pare kerd ke ganî îfadeyê binakokîyî yê Zeyînal Abarakovî bêrê roşnkerdene û telefon û hacetê teknîkî yê Abarakovî bêrê cigêrayene. Karakaya vat: "Ma do tim vajê Gulîstane Doku ça de ya. Ma sey rêxistinanê cinîyan zanenê ke yeno waştene ke kiştiş, tacîz, tecawuzê cinîyan bêrê normalîzekerdene. Ma reyna qîrenê vanê ke ma do vera na rewşa bêveng nêmanê û isrardar bibê ke sucdarî bêrê cezakerdene û nê hêrişî bêrê vindertene. Hînî sebrê ma nêmend ke ma ra yew zî kêm biba. Ma nêmeyê cuye yê, ma wayîrê cuyanê xo vejîyenê."