Wekîle Lorena Delgado Varas bi nameyê Partîya Çepe ya Swêdî seba tay pêvînayîşan şîye Şîlî û bi rêxistinanê cinîyan, karkeran û komelê sivîlî reyde pêvînayîşî kerdî. Varase pare kerd ke cinîyê ke par tewrê xoverdayîşê şarî yê vera zêdîyayîşê vayî bîyî, radîkal bîyî û amadekarîyan kenê ke Partîya Femînîste awan bikerê.

Varase menga çeleyî de bi hewteyan Şîlî de pêvînayîşî kerdî û ANFyî reyde qala çimdarîyanê xo kerde. Varase ard ziwan ke Şîlî têgêrayîşêko xurt ê cinîyan a û vat: ''Têgêrayîşê 8ê Adare zaf xurt o. Sendîka û rêxistinê bînî wayîrê têgêrayîşanê cinîyan ê. Nêzdîbîyayîşo pederşahî rastê nêrazîbîyayîşê nînan yeno. Rêxistinêka sîwane ameye awankerdene ke têgêrayîşê karker, karmend, cinî û wendekaran tede ca gênê. Labelê têgêrayîşê cinîyan eşkera kerd ke rêxistine zaf radîkal nîya û tira ca bi. Cinîyî seba ke Partîya Femînîste awan bikerê kar kenê. Bi vînayîşê mi hewce yo ke partîyêka winasêne ya cinîyan biba.''

Varase bale ante vengdayîşê performansê Las Tesîsî yê vera şîdetê cînsî ser û da zanayene ke nê vengdayîşî seba cinîyanê Şîlî bi hêz û waştişê înan ê têkoşînî pîlêr kerd. Varase vat: ''Cinîyî bi hawayêkê xurtî tewrê nawnayîşanê di hewteyan ê peyênan benê. Têgêrayîşo Femînîst seba 8ê Adare Roja Cinîyan ê Kedkaran ê Dinya amadekarîyanê pîlan keno. Têna şaristanan, qezayan de ney dewan de zî 8ê Adare do fîraz bikerê.''