Cinîyî sey her serre emser zî  25ê Teşrîna Peyêne Roja Têkoşînê Vera Şîdetê Serê Cinîyan a Dinya bi çalakîyan pêşkêş kenê. Cinîyê ke vera şîdetê serê cinîyan xo rêxistin kenê Kurdîstan, Tirkîya û Dinya de emser bi şîarê Jin, Jiyan Azadî kuçeyan de xebatanê xo domnenê.

Ma derheqê 25ê Teşrîna Peyêne Roja Têkoşînê Vera Şîdetê Serê Cinîyan a Dinya cinîyan ê Amedî rê mîkrofonê ANFyî kerd derg.

Hasrete Yorulmaz: Seba ke kiştox û hêrişkarî nînê cezakerdene, caardişê şîdetî zêdîyeno. Ganî helêke cuwa ver Pêkerdişê Îstanbulî pêser bêro. Ganî cinîyî pêro waran de paştî bidê yewbînan û yewbînan bipawê. Bitaybetî ganî Merkezê Pawitişê Cinîyan dahîna zaf bê. Ganî ma sey cinîyan têkoşîn bikerê, komelê camêrdê serdestî birijnê û hişmendîya cinîyan xurtêr bikerê.

Gulaye Aktag: Bingeyê şîdetê vera cinîyan de projeyêk est o. Peyê nê de hêzêko xurt est o. Destur nêdanî wa şîdetê vera cinîyan bêro cigêrayene. Çunke no projeyêk o. Kenê ke nê welatî bibedilnê, çîn bikerê. Çi heyf ke Tirkîya de dîktatorîye est a. Rejîmê yew merdimî de çew nêeşkeno vengê xo vejo. Seba ke pêro hêz destê înan de yo cinîyî raştê hêriş û şîdetî yenê.

İlknure Çoban:  Şîdet û cînayetê vera cinîyan ma tersnenê. Ma vanê beno ke nê bêrê serê ma zî. Ganî ma domananê xo raşt perwerde bikerê. Her roje cinîyî yenê qetilkerdene û ma nêeşkenê verê ci bigîrê.

Hayriye Seri: Çi heyf ke roja ma de cinîyî raştê şîdetî yenê.  Cinîyî mîyanê komelî de sey kesanê bêhêzan yenê vînayene. Ganî cinîyî linganê xo ser vinderê û têkoşîn bikerê. Seba ke kiştox û hêrişkarî nînê cezakerdene, şîdet û hêrişê vera cinîyan tim zêdîyeno.