Kuçeyê Hunerî yê qezaya Yenîşehîrî yê Amedî de perey Meleke Aslan (24) hetê birayê xo Mustafa Aslanî (20) ra amebî qetilkerdene.

Platformê Cinîyan ê Amedî cayê serebûtî de eşkerayîye daye. Cinîyan pankartê bi nuşteyê 'Vera qirkerdişê cinîyan ma şîn nêkenê sere wedarenê', 'Ma kişîyenê çunke dewlete kştoxan pawena', 'Seba Meleke ma sere wedarenê', 'Peymana Îstanbulî cuye pawena' akerdî. Cinîyan sloganê sey 'Cinîye, Cuye, Azadîye' û 'Kişîyayîşê cinîyan polîtîk o' vatî.

Temsîlkar û îdarekarê Komeleya Cinîyan a Rosa, Torra Têkoşînê vera Şîdetî ya Amedî, Partîya Sosyalîste ya Bindestan (ESP), HDP, CHPyî zî tewrê eşkerayîye bîyî.

Hemsereka Sendîkaya TUM BELî Nîhale Yanik eşkerayîye de qisey kerd û vat: ''Seba ke tacîz, tecawuz û kiştişê cinîyan bêceza manenê serebûtê winasênî zêdîyenê. Îqtîdar cinîyanê muxalîfan ser o teda keno la ma do qet têkoşînê xo ra fek vera nêdê. Şîdetê vera cinîyan îqtîdarê AKPyî de netîceya polîtîkayanê ci de zaf zêdîya û hînî sebrê ma nêmend. Ganî Peymana Îstanbulî bêra caardene û verê şîdetê camêrdan bêro girewtene. Têna birayê ci nê kişîyayîşê Meleke ra dişmenîya cinîyan zî berpirsîyar o. Ma do vera hîşmendîya camêrdan her ca de têkoşîn pîl bikerê.''

Nîhale Yanik da zanayene ke Meleke Aslan bi hawayêkê nimiteyî ameye definkerdene û no nêna qebulkerdene. Nîhale Yanik vat: ''Dewlete senî ke nêzdîyê şîdetî bena bi na qayde nêzdîyê cenazayanê cinîyan zî bena. Ma her roje kişîyenê çunke faîlan rê cezaya zixme nêna dayene. Ma kişîyenê çunke dewlete kiştoxan pawena, vengê ma nêeşnawena. Ma do vera meşrûkerdişê şîdetî yê îqtîdarî bêveng nêmanê.''