Partîya Çep a Keske Vakurê Kurdîstanî de xebatanê xo rê bêmabên dewam kena. Partîye 14ê nîsane de Dêrsim de buroyê xo yê weçînayîşî akerdbi. Namzeta Wekîlîye ya Dêrsimî ya Partîye Çep a Keske Aytene Kordu zî tewra akerdişî bibî.

Cinîyê ke tewrê akerdişê buroyî bîyê, înan derheqê waştiş û hêvîyanê xo de Ajansê Mezopotamya rê qisey kerd.

Pakîze Aydin pare kerd ke Îtîfaqê Kede û Azadîye cinîyan rê bîyo hêvîyêke û vat: ''Cinîyî bi serran o vera îqtîdarê AKP-MHPyî têkoşîn kenê. Nê îqtîdarî Peymana Îstanbulî ya ke seba cinîyan zaf girîng a, betal kerdbî. Seba ameyoxê xo, ma rayanê xo bidê Partîya Çep a Keske. Seba ke na dîktatorîye bişawê ma do pîya têkoşîn bikerê.'' 

Gultene Gurbuz vat: ''Seba ke AKPyî bin bivisnê, destê ma ra çi bêro ma do bikerê. Ma seba cinîyan têdûştîye, azadîye û edalet wazenê. Ma do heqanê cinîyan bigêrê, wayîrê heqanê xo vejîyê. Ma do Dêrsim de seba cinîyan çîyanê neweyan wazenê. AKP do şoro.'' 

Merale Yildiz vat: ''Partîya Çep a Keske do verê demokrasî abikera. Ma wazenê ke wa Dêrsim bibo şaristanê cinîyan. Ma pê bawer ê ke namzeta ma Aytene Kordu do meseleyanê cinîyan bîyara ziwanî û têkoşînê cinîyan pîl bikera.'' 

Besîme Gok vat: ''Ez pê şarê Dêrsimî bawer a. Seba ke namzeta ma cinî ya, cinîyî do hîna aktîf bibê. Naye ra pey zî ma do xebatanê xo de hîna zaf vengê xo vejê û meydanan de bibê. Wa şarê ma paştî bido namzeta ma. Ma cinîyî zaf xurt ê. Ma do bivurnê.'' 

Bîrsene Orhan vat: ''Rejîmê Qesre wa hol bizano ke pê qefilnayîşê HDPyî nêeşkeno ser bikewo. Ma sey cinîyan do bi xurtî paştî bidê namzeta xo. Ma bi sloganê 'jin, jiyan, azadî' buroyê xo akerd. Ma sloganê xo do bikirişnê Meclîsî. Sey cinîyanê Dêrsimî ma bi rayanê zêdeyan do bikewê Meclîsî.''