Endamê HDP’yî yê ciwanî do bi “Kombîyayîşê Cinîyan ê Ciwanan“, 17’ê Sibate de Amed de bêrê têhet. Kombîyayîş do bi beşdarîya 300 cinîyanê delegeyan, bi şîarê ‘Bi ruhê cinîyan ê ciwanan xover bide, tecrîdî bişikne‘ û ‘Ciwîyayîşo azad, bi cinîyan ê azadan mumkun o‘ bêro viraştene.

Tirkîya û Kurdistan ra xeylî cinîyî do beşdarê nê kombîyayîşî bibê. Rojdemê kombîyayîşî de tecrîd, grevê vêşanîye, tacîz, tecawuz û polîtîkayê asîmîlasyonî do bibê.  Endama Heyetê Rayberdişî ya Meclîsê Cinîyan ê HDP’yî Buşra Kuyune, derheqê programî de malumatî dayî.

Kuyune va ewro mabênê şarî de tesîrê prosesê sîyasîyî yo giran esto û wina dewam kerd: “ Nê prosesê sîyasîyî ver ma rê wezîfe vejîyo, no wezîfe o yo ke ganî ma xoverdayîş û mucadeleyî hîna bikê hîra. Seba naye zî ma qerarê kongre ra dima planê konferansê cinîyan viraşt. O dem ra nat ma xeylê herêman de kombîyayîşê taybetî viraştî. Bi nê kombîyayîşan xeylî cinîyê ciwanî yê neweyî beşdarê xebatanê ma bîyî. Hetê moral û motîvasyonî ra,kombîyayîşî zaf baş derbaz bîyî. Ma aktîvîteyê atolye û sînema zî kerdî.“

MA DO DUŞTÊ POLÎTÎKAYANÊ QILÊRINAN Ê VERA CINÎYAN MUCADELE BIKÊ

Kuyune qiseykerdişê xo de bale ante polîtîkayê qilêrin ê ke vera cinîyan yenê bicaardene ser û va do zîynîyetê nêrîyîye yo ke wazeno cinîyan teslîm bigîro ver zî mucadele bikê û nê zîhnîyetê qilêrinî ver bi yewbîyayîya cinîyan bivindê.Kuyune derheqê xebatanê xo de wina qisey kerd: “ Ma xebatanê xo de kenê wa cinîyê ciwanî xo ra bipersê vajê cinîyê ciwanî kam ê, çi wazenê, serkeşîya cinîyanê ciwanan yena çi mane û vera faşîzmê nêrîyîye senî mucadele yeno kerdene. Sey nimune ma tecawuzî ser qisey kerd, tecawuz tena yew cinîye rê nê, erd, cuya û şarê aye rê yeno kerdene û no bi destê faşîzmê zîhnîyetê nêrîyîye yeno kerdene. Babetê winasîyî kombîyayîşanê ma de ameyî qiseykerdene. Vejîya meydan ke ganî ma demê verê ma de, hîna zêde bixebitê û programanê neweyan bivirazê.“

ROLÊ CINÎYAN GUVENE DE YENO TARIFKERDENE

Kuyune wina dewam kerd: “ Ewro şexsê Rayber Ocalanî de, pêroyê şarê Kurdîstanî, cinîyan, cinîyanê ciwanan ser tecrîd yeno dewam kerdene û bi no qeyde kenê ke îradeya her kesî û her hetî bişiknê. Guvene bi çalakîya xo cewabêko zaf pêt da.  Bi bedenê xo xoverdayîşêko bêemsal awan kerd. Merdim ke nînan bîyaro çimanê xo ver, vîneno ke prosesêko tarîxî herekîno û no herekîyayîş de serkeşîye destê cinîyan de ya. Bi nê esasan, ganî ma zî wayîrê xoverdayîşê Leyla Guvene bivejîyê û nê xoverdayîşî hîna pêt bikê. Tîya de wezîfeyo tewr giran ê cinîyanê ciwanan o.“